Qırımtatar asıllı ukrain yırcısı Jamalanıñ fikirince, işğal altındaki Qırım vaziyeti aqqında yır yazmaq yañlıştır. Bu mevzuda mühtekirlik yapılğanını tanıy bileler.
«Bu mühtekirlik, yaramay ve yañlış bir şeydir. «1944» yırı kibi ayatımda yekâne bir yer ola bile. Er kün böyle yırlar yazsam, can sıqıcı ve meraqsız olur. O, («1944» yırı – QA) samimiy olğanından keçti ve bütün şablonlarnı yoq etti. Birisi sahtelik ve mühtekirlik eşitse edi, bu yır iç bir vaqıt ğalebe qazanmaz edi. Men ilerilemege devam etem – yañı fikir, yañı duyğularnen», – dep ayttı yırcı Qırım.Aqiqatqa fevral 1-de Kyivde olıp keçken matbuat konferentsiyasında.
Jamalarnıñ qayd etkenine köre, «Eurovision-2016» yarışında ğalebe qazanğan soñ qırımlılarnıñ destegi oña ilham berdi.
«Ne yazıq, bizim qomşularımız bu ğalebeden o qadar qorqtılar, çeşit türlü şeyler uydurıp, maña biñlernen yayın bağışladılar. Olarnı ğalebem sarsıtt, çünki insanlar ilham aldı. Serbestlikten ilham alğan insanlardan qorqulır, olar ileri ketmege tırışalar. Olar er şeyni yaparlar», – dep ayttı yırcı.
Matbuat konferentsiyasında Jamala mayıs 12-de Kyivdeki Sport sarayında ötkerilecek «I Believe in U» yañı programmasınıñ kontsertini ilân etti.
