İşğal etilgen Qırımğa sıñırdaş olğan Herson vilâyetinde yañı şerifler – bölge polis hadimleriniñ cemaat yardımcıları qabul etile. Bunı Qırım.Aqiqatqa yanvar 18 künü Herson vilâyet emek merkeziniñ vekili Natalya Portugalskaya bildirdi.
«Devlet organlarınen yañı programmalarnıñ qabul etilmesi boyuca işler alıp barıla, cemaat işleri ötkerilecektir, şu cümleden «Şerifler» programması çerçivesinde de areket yapılacaq. Yañı qabul etüv başlandı», – dedi o.
Yanvar 16 künü herson emek merkezinde, 2016 senesi devamında Qırım ile memuriy sıñırda 84 ukrain şerifi çalışqanını beyan etken edi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ilhâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
