Link açıqlığı

Saatnıñ esas haberi

ATR içün para berilmesine yol açacaq vesiqalar dekabr 26-na qadar azır olmalı – Ceppar


Emine Ceppar
Emine Ceppar

Ukraina Maliye nazirligi ukrain ükümetinden ATR telekanalına maddiy yardım kösterilmesi içün 2016 senesi dekabr 26 kününe qadar bütün vesiqalarnı azırlamaq kerek. Bunı haber siyaseti naziriniñ birinci muavini Emine Ceppar Qırım.Aqiqat saytına dekabr 8-de bildirdi.

«Bu ne qadar sürecek (para berilmesi – QA) – zor aytmaq, amma dekabr 26-na qadar bu esnas yekünlenmeli, dep billem. Yılnıñ soñuna qadar, dekabr 26 kününe qadar, bütün vesiqa, pasport, añlaşmalar azır olmalı», – dedi Ceppar.

Nazirniñ birinci muavini dey ki, al-azırda mesele vesiqalarnıñ azırlanmasına bağlı.

«Maliye nazirligi pasportnı tasdıqlamalı. Maliye naziri buyruqnı imzalaycaq. Soñra añlaşmalar tizilecek, hazine idaresi içün vesiqalar azırlanacaq. Para berilmesi problem degil, vesiqalar azırlanmalı. Vesiqalar azır olsa, para da berilecek», – dep qoştı o.

ATR telekanalınıñ saibi Lenur İslâmov muarririyet aqımdaki sene ukrain ükümetinden maddiy yardım köreceginden şübelengenini bildirgen edi.

Ukraina Nazirler şurası ATR qırımtatar telekanalına maliye sermiyasınıñ ayrılmasını belgiledi. Bu aqta qarar dekabr 7-de ötkerilgen toplaşuvda qabul etildi.

Ukraina Yuqarı Radası noyabr 17-de olıp keçken umumiy toplaşuvında Ukraina Nazirler şurasına Qırım Muhtar Cumhuriyeti ve Aqyarnıñ teleradiokompaniyalarına devlet bücetinden maddiy yardım köstermege imkân berecek №5333 qanun leyhasını qabul etken edi.

Ukraina halq deputatı Refat Çubarov Yuqarı Radada çıqışta bulunıp, 35-36 million grivna maddiy yardım aqqında laf ketkenini aydınlattı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG