Link açıqlığı

Saatnıñ esas haberi

«Hizb ut-Tahrir davasınıñ» iştirakçilerine apis cezası eki ayğa qadar arttırıldı


«Hizb ut-Tahrir davasınıñ» iştirakçisi Arsen Cepparov, arhiv fotoresimi
«Hizb ut-Tahrir davasınıñ» iştirakçisi Arsen Cepparov, arhiv fotoresimi

İşğal etilgen Aqmescitniñ Kyiv rayon mahkemesinde dekabr 5-de «Hizb ut-Tahrir davasınıñ» iştirakçileri Arsen Cepparov ve Müslim Aliyevniñ apis cezası eki ayğa qadar arttırıldı, dep bildire Qırım.Aqiqat mühbiri.

Berilgen malümatqa köre, qabaatlanğanlarnıñ apis cezası 2017 senesi fevral 8-ne qadar uzatıldı.

«Hizb ut-Tahrir davasınıñ» eki iştirakçisi Arsen Cepparov ve Refat Alimov noyabr 24-de Aqmescitteki №15 psihiatrik hastahanege mecburiy ekspertizadan keçmeleri içün avuştırılğan.

2016 senesi noyabr 17-de «Hizb ut-Tahrir davası» boyunca yaqalanğan Müslim Aliyev mecburiy psihiatrik hastahanege yollanılğanını haber ettiler.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG