Link açıqlığı

Qırımtatarı Muhammed Mamutov «UMMA» Ukraina musulmanları diniy idaresiniñ esabat-saylav toplaşuvında tekrar eki yılğa müfti muavini olaraq saylandı. Bunı Mamutov Qırım.Aqiqat saytına bildirdi.

«Meni ekinci kere sayladılar», – dedi o.

Mamutovnıñ qayd etkenine köre, o, müfti Said İsmagilov meşğul olğan vaqıtta onı temsil ete. Bundan ğayrı, Mamutov Zaporojye şeeri ve vilâyetinde «UMMA» UMDİ musulman cemiyetleriniñ işini idare ete.

«Regionımda iş yapam. Tek Zaporojye degil, vilâyette de. Melitopol ve Berdânsk», – dep ayttı Mamutov. İş maqsadı olaraq Berdânskta musulmanlar cemiyetini qurmaqnı köre.

Esabat-saylav toplaşuvınıñ rey berme aqqı olğan 23 iştirakçisinden 16 kişi Mamutovğa qoltuttı. Toplaşuvda «UMMA» UMDİ cemiyetleriniñ 32 vekili iştirak etti. Müfti olaraq tekrar Said İsmagilov saylandı.

32 yaşında Mamutov Qırım işğalinden evel köçken Zaporojyede «UMMA» UMDİ cemiyetiniñ imamı ola. O, Aqmescitteki «Seyit Settar» medresesini bitirgen edi, 2004 senesi Aqmescitteki Aliy hafız mektebinden mezun oldı, Urdunda arapça ögrenip, Quran-ı Kerim derslerini berme aqqını qazandı. Urdundan qaytqan soñ Hafız mektebinde ders bergen edi. Canköy rayonında imam olıp çalışqan. Qırımnıñ biznes institutında «halqara iqtisadiyat» zenaatını alğan.

XS
SM
MD
LG