Qırım ve Ukraina arasındaki memuriy sıñırda qurulğan yañı TV qullesinden Herson vilâyetiniñ cenübiy regionlarına ve Rusiyeniñ işğalinde bulunğan yarımadağa yollanılacaq ukrain yayılarını Kreml kontrolündeki Qırım akimiyeti kestirip olamaz. Böyle fikirni Ukraina TV ve radio yayınlav sualleri boyunca Milliy şura azası Sergey Kostinskiy seslendirdi, dep bildire Ukrinform.
«Men bellesem, olarnıñ şimdi Qırımda olğan telekomunikatsion infrastrukturaları buña yetmez. Olanıñ qarşı yayınlarnı kestirmek imkânları yoq. Aletler yoq. Ve elektrik meselesi – olar bunı yapacaq olsalar, demek, bunsız da yetişmegen resursnı qullanacaqlar. Lâkin olar devamlı surette yayınnı kestirip olamaycaqlar», – dedi Kostinskiy.
Onıñ sözlerine köre, Çonğardaki ukrain TV qullesi 5 KW küçlügi ile çalışacaq ve o regionda eñ büyük olacaqtır.
«5 KW küçliginde yayınlarnı kestirmek içün, öbür taraftan daa küçlü dalğa yollanılmaq kerek. Bu ise elektrik energiyasını, bericiler ve diger şeylerni kerektire», – dep qayd etti Kostinskiy.
Bundan ögüne, Kreml kontrolündeki Qırım İçki siyaset, haber ve bağ naziri Dmitriy Polonskiy, ukrain yayınları, Rusiye qanunlarına uymağanları sebebinden, Qırımda kesileceklerini beyan etken edi.
Dekabr 2 künü Çonğarda TV ve radio qullesiniñ temeline birinci blok qoyuldı. Dekabrniñ soñunda Qırım sakinleri gece-kündüz devamında çalışacaq dört ukrain radiostantsiyasını eşitip olacaqları beklenile.
Ukraina TV ve radio yayınlav sualleri boyunca Milliy şurası Herson vilâyetinde televizyon ve radio yayınlarınıñ inkişaf ettirilmesi ve işğal etilgen Qırımğa yayınlarnıñ tarqatılması içün mahsus strategiya leyhasını azırladı. Strategiyanıñ maqsadı – Herson vilâyetiniñ daa çoq yerine analog ve dijital yayınlarnı yetkizmek, ve işğal etilgen topraqladan çıqqan efir yayınlarını Herson vilâyetiniñ cenübiy taraflarına yibermemektir.
