Link açıqlığı

Uquq qorçalayıcılar Qırım sakini sürgün etilgenini bildirdiler


Kezlev sakini, faaliyetçi Konstantin Sizarev, kendisiniñ sözlerine köre «ecdatları Qırımda 1208 senesinden berli» yaşağanlarına baqmadan, «Rusiyede bulunma müddetini bozğanı sebebinden» yarımadadan sürgün etile. Böyle qararnı «Kezlev şeer mahkemesi» qabul etti. Bu aqta dekabr 3 künü Qırım uquq qorçalayıcılar gruppası Facebookta haber etti.

Teşkilâtta deyler ki, Konstantin Sizarevniñ sözlerine köre, 2014 senesi aprel ayından berli o Rusiye pasportınıñ berilmesini talap ete, amma alamay. Böyle pasport oña vatanında yaşamağa imkân berecek edi.

«O ende bu mesele boyunca «Kezlevde Rusiye köçüv hızmeti bölügüniñ mudiri» Kurnosenko Eduard Valeriyeviç ile mahkemede tartışa edi. Lâkin vesiqalar oña ve onıñ ballarına öyle de berilmedi», – deyler uquq qorçalayıcılar.

Faallerniñ malümatına köre, Kezlev şeer mahkemesiniñ mahkemecisi Lobanova Galina Borisovna «Sizarevni Rusiye memuriy bozuvlar Kodeksiniñ 1-1 q. 18 mad. boyunca qabaatladı ve 2000 ruble para cezası ile «Rusiye Federatsiyasından tış» sürgün etmege qarar aldı».

Konstantin Sizarev, «YUSTİ*S» adliyeci student ve aspiranrlarnıñ ilmiy cemiyeti» teşkilâtınıñ tesisçisidir. Bu teşkilât daa 90-cı yıllarnıñ soñunda peyda olğan edi ve faqir insanlarğa bedava adliye hızmetlerini ve uquqiy yardım bere edi.

Keçenleri Kezlevdeki rus prokuraturasınıñ talabınen Rusiye İçki işler nazirligi «YUSTİ*S» cemaat teşkilâtınıñ işini teşkirüvden keçirdi. «Teşkerüv» neticesinde teşkilâtnı qapatmağa ve onıñ tesisçisine qarşı cinaiy iş açmağa qarar alınğan edi. Konstantin Sizarev – Kezlevli faaliyetçi, evelleri 2004 senesi yerli uquq qoruyıcılarnıñ qanunsız areketlerine oğratıla edi. 2013 senesi o İnsan aqları boyunca Avropa mahkemesinde Ukraina qarşı mahkeme işini qazanğan edi.

XS
SM
MD
LG