Rusiyde Ukrainanıñ işğal etilden Qırım yanında keçirgen arbiy idmanları «mısqıllama» kibi qabul etildi. Bunı 2 dekabr künü Qırım.Aqiqat Radiosınıñ saba efirinde rusiyeli arbiy jurnalist Arkadiy Babçenko bildirdi.
«Kreml kontrolünde olmağan cemaat fikiri aqqında söz yürsetilse, mında sualler peyda ola. Bu ateşniñ maqsadı añlaşılmay. Añlaşıla ki, bu bir trolling çeşiti, lâkin onıñ manası pek te añlaşılmay», – dedi Babçenko.
Programmanıñ diger musafiri – Ordu, dönüşüv ve silâsızlanma tedqiqatlar Merkeziniñ müdir muavini – Mihail Samüsniñ fikirince, idmanlarnı tam bir maqsatnen ötkerdiler – bazı vaqıtları Qırım üzerindeki vaziyetni Rusiye idare etkeni kibi davranğan Halqara grajdan avacılıq teşkilâtını «yerine qoymaq».
«Tünevinki atışlar İCAO teşkilâtına öz noqta-i nazarını açıqlamağa, bu Ukrainanıñ toprağı olğanını ve andaki uçuşlarnıñ telükesizligi içün Ukraina mesuliyetli olğanını beyan etmege imkân berdi», – dedi Samüs.
Dekabr 1, cumaaqşamı künü ukrain arbiyleri (Herson vilâyeti) Aleksandrovka köyu civarında orta uzaqlıqta uçqan, idare etilgen zenit raketalarınıñ kontrol deñemelerini keçirip başladı.
Keçenleri Rusiye Tışqı işler nazirligi beyan etti ki, Ukraina akimiyeti işğal etilgen Qırım yanında keçirmege niyetlengen raketa ateşleri - «provokatsiyadır» ve Moskvadan «qattı cevap» almaq içün yapıla. Ukraina Tışqı işler nazirliginde, Qırım yanında ötkerilecek Ukrainanıñ raketa idmanlarına Rusiye tarafından küç ile qarşılıq kösterilecegi aqqında qorqutuvlar seslendirilgenini tasdiqladılar. Ukrain arbiyleri beyan eteler ki, idmanlar halqara uquqnıñ talaplarına köre ve plan boyunca ötkerile.
