Link açıqlığı

Saatnıñ esas haberi

«Çiygoznıñ işi» boyunca mahkemede şaat olğan milis hadimi, mabusnıñ qanun bozğan areketlerini körmegenini bildirdi


2014 senesi 26 fevral künü Qırım Yuqarı Şura binası yanında ötkerilgen miting devamında Ahtem Çiygoz iç bir qanun bozuvını yapmadı. Advokat Nikolay Polozovnıñ Qırım.Aqiqatqa bildirgeni kibi, böyle ifadelerni 1 dekabr künü «Çiygoznıñ işi» boyunca mahkemede şaat seslendirdi.

O dedi ki, mahkeme oturuşlarınıñ 50-ci kününde şaat olaraq Valeriy Gritsay soraldı, 2014 senesi fevralde o Qırım Muhtar Cumhuriyetinde Ukraina İİN cemaat telükesizlik idaresiniñ yolbaşçısı edi, şimdi ise aynı vazifede Rusiye İçki işler nazirliginde buluna.

«Onıñ malümatına köre, mitingniñ keçirilecegi aqqında haber kün evelden 25 fevralde alınğan edi, militsiyanıñ, cemaat tertibini qorumağa azırlanması içün yeterli qadar vaqıtı bar edi. Şahsiy erkândan 550 insan celp etilgen edi, saba saat 8-de militsiya hadimleri bina yanında toplaşıp, turuşnı azırlay ediler. Bir-qaç kere Ahtem Çiygoznı kördi, o qanun bozuvlarını yapmay edi», – dedi advokat.

Soralğan şahıs Şura binasına atıluv aqqında da tarif etti, közyaş gazı qullanılğanını qayd etti, lâkin gaznı kim qullanğanını o bilmey.

«O dedi ki, Ukrainada kütleviy nizamsızlıqlar yüz berecek vaziyetler içün mahsus «Dalğa» planı bar edi. Lâkin o künü bu plan amelge keçirilmegen edi, çünki bunıñ ihtiyacı yoq edi. Ukraina İİN hadiminiñ fikirince, kütleviy nizamsızlıqlarğa işaret etken vaziyetler o künü olmağan edi», – dep, advokat şaatnıñ sözlerini tekrarladı.

Polozovnıñ qayd etkenine köre, soraştırılğan insan, Çiygoz tarafından kütleviy nizamsızlıqlar teşkil etilgenini tasdiqlaycaq iç bir ifade berip olamadı.

Nevbetteki mahkeme toplaşuvı 5 dekabr künü ötkerilecek.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG