Bağçasaray rayonında yerleşken Aci-Su maden suvu Qırımda ilk olaraq tedaviy-şifaiy yer ve yerli kurort statusını alacaqtır. Bunı Aqmescitteki matbuat konferentsiyasında noyabr 29-da Rusiye tayin etken Qırım kurort ve turizm naziri Sergey Strelbitskiy bildirdi, dep haber ete RİA Krım.
«Qırımda böyle yerlerimiz yoq. Kelecek sene birinci adım atmaq içün Bağçasaray rayonındaki «Aci-Su» maden suvunı sayladıq», – dedi o.
Strelbitskiy qayd etti ki, Aci-Su maden suvuna tedaviy-şifaiy yer ve yerli kurort statusı berilse, bu topraqnıñ «bir de bir deñişmelerden qorçalanma» ve oña «kelecekte inkişaf etmesi içün belli bir imkânları» olacaq.
Aci-Su maden suvu Bağçasaray rayonındaki Kökkoz özeninde, Yañı-Saladan 3 km mesafede yerleşe. Şifalı maden suvu üç yıldan berli qullanıla ve hlorid-natriy-kaltsiyli serovodorod ile orta minerallı suvğa aittir. Çoqraq suvu revmatizm, radikulit, işias, ekzema ve diger teri hastalıqları içün faydalıdır.
