Link açıqlığı

Saatnıñ esas haberi

Poroşenko: açlıq qurbanları olğan millionlarce insannıñ ögünde borcumız – yekâne Ukrainanı saqlamaq


Tasviriy resim
Tasviriy resim

Ukraina prezidenti Petro Poroşenko açlıqtan elâk olğan millionlarce insannıñ ögünde cemiyetniñ borcı – yekâne ukrain devletini saqlamaq olğanını ayttı. Bunı o Twitter saifesinde noyabr 26 künü, Golodomor qurbanlarınıñ hatıra Kününde yazdı.

«Golodomor teşkilâtçılarınıñ müthiş cinayetleri aqqında hatıra bizge kelecegimizni qorumaq içün küç bere. Ukraina hatırlay ... Otuz ekinci ve otuz üçünci ile bizni qırdılar, lâkin yıqmadılar. Bizler ise açlıq qurbanları olğan millionlarce insannıñ aziz hatırası ögünde – yekâne, mustaqil, birdemli Ukrainanı saqlamaq borçlumız», – dep beyan etti devlet yolbaşçısı.

Petro Poroşenko ömür arqadaşı ile birlikte 1932-1933 seneleriniñ Golodomor qurbanlarını añıp, Kyivniñ Mihaylov meydanında Golodomor qurbanları hatırasına qoyulğan abideniñ tübünde boğday destelerini yerleştirdi. Perzident ailesi, ölgenlerni sükünet daqqasınen añdı.

Künniñ ekinci yarısında prezident «Golodomor qurbanları Memorialı» yanında matem merasimlerinde iştirak etecek.

Golodomor qurbanlarınıñ hatıra künü Ukrainada noyabrniñ dörtünci cumaertesi kününe belgilendi.

Ukraina, ilmiy-demografik ekspertizanıñ neticelerine atıf etip, 1932-33 seneleri suniy açlıq aqibetinde ölgenlerniñ umumiy sayısı 3 million 941 biñ nefer insannı teşkil etkenini, doğula bilecek lâkin doğulmağanlarnıñ ğayıbı – 6 million 122 biñni teşkil etkenini bildire.

XS
SM
MD
LG