Kelecek sene devamında Qırımda elektrik fiyatları Rusiyedeki fiyatlarğa qadar ösecek. Bunı noyabr 25 künü Qırımdan Rusiye Devlet Dumasına saylanılğan deputat Mihail Şeremet bildirdi, dep haber ete Novosti Krıma agentligi.
Şeremetniñ sözlerine köre, qomşu Rusiyede elektrik fiyatları eñ azından eki qat paalıcadır.
«Bizler şimdi dotatsiya alamız, lâkin 2017 senesi devamında bizde üç ayda bir, fiyatlar kösterilecek ve umumrusiye fiyatlarına teñ kelecek», – dedi Şeremet.
Onıñ sözlerine köre, elektrik fiyatlarınıñ paalılaşması Qırım sakinkeriniñ bolluğına tesir etmez.
«Ealige bu tesir etmez, çünki bizde dotatsiya ve tazminatlar olacaqtır. Bellesem, biz bu vaqıtnı ağırlıqsız keçermiz», – dep büyürdı o.
Rusiye tarafından işğal etilgen Qırımda, 2016 senesi baarde Rusiyeden keçirilgen elektrik köpüriniñ üçünci pıtağı işke keçirilgen olsa da, ışıq söndürüvleri devam ete. 2015 senesi dekabr ayından başlap, elektrik direkleriniñ bozulmasından sebep, Qırımğa esas Ukrainadan elektrik aqımı ketmey. Şimdi Qırım özü çıqarğan energiyasını, Rusiyeden ketirilgen generatorlar ve Kubanden keçirilgen energetik köpürden kelgen energiyanı qullana.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ işğal ve ihlâq etilmesini qanunsız areket olaraq tanıdılar. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
