Link açıqlığı

Ukraina Telükesizlik (SBU) hızmetiniñ matbuat-kâtibi Olena Gitlânska, Rusiye Federal telükesizlik hızmeti tarafından nevbetteki «Ukrain casusı» yaqalanğanı aqqında bilgisi olmağanını ayttı, lâkin rus tarafınıñ beyanatını uydurma olaraq tanıttı.

«Mende şimdi böyle malümat yoq, lâkin men eminim, bu uydurma. Olar er kün yanal haberler tarqatalar, qabaatsız insanlarnı yaqalaylar», – dedi Gitlânska Radio Svobodağa bergen izaatında.

Rusiye Federal telükesizlik hızmeti noyabr 24 künü, işğal etilgen Qırımda Qara deñiz flotunıñ sabıq askeri Leonid Parhomenkonı yaqalağanını bildirdi. Onı devlet hainliginde qabaatladılar. Rusiye taqiqatçıları, yaqalanğan kişi Ukrainanıñ menfaatına casuslıq yapıp, flot aqqında gizli malümatlarnı çetel mahsus hızmetlerge teslim etkenini beyan eteler.

Keçken aylar devamında Rusiye ve onıñ Qırımda tainlegen işğalci akimiyeti bir-qaç kere beyan etti ki, sanki Ukraina Mudafaa nazirliginiñ Baş istihbarat idaresiniñ saflarından «Ukrain diversant-teroristleri» yaqalana edi. Kyivte böyle beyanatlarnı ve Qırımda yaqalanğan Ukrain vatandaşlarına atılğan qabaatlavlarnı red ettiler ve provokatsiya olaraq tanıdılar.

XS
SM
MD
LG