Advokatlar Mark Feygin ve Nikolay Polozov noyabr 28-de Kyivde keçirilecek matbuat konferentsiyasında qırımtatar halqınıñ lideri Mustafa Cemilevniñ oğlu Hayserniñ Rusiye apishanesinden azatlıqqa çıqış ketişatını aydınlatacaqlar. Bunı Mark Feygin Facebookta bildirdi.
«Cuma künü, noyabr 25-de, Kyivge kelem ve bazarertesi kününe qadar anda olacam. 28-de saba saat 11:00 «UKRİNFORM» agentliginde Nikolay Polozov ile matbuat konferentsiyamız bar. Cuma künü devamında Cemilevniñ oğlu Hayserniñ Astrahan apishanesinden azat etilmesini añlatacaqmız», – dep yazdı Feygin.
Hayser Cemilevniñ apis cezası cumaertesi künü, noyabr 26-da, soñuna kele, amma Rusiye qanunlarına köre, onı soñki iş künü, yani cuma künü, noyabr 25-de, azat etmek kerekler.
Hayser Cemilev 2013 senesi mayısta Bağçasaraydaki eviniñ azbarında babasınıñ silâsından qoranta tanışı Fevzi Edemovnı öldürmesi ile qabaatlana. Qırım işğalinden soñ Rusiye taqiqat organları işni ğayrıdan taqiq etmege qarar alğan edi. Hayserni Aqmescit SİZOsından Krasnodar ülkesine alıp kettiler.
Hayser Cemilev Astrahanniñ №10 apishanesinde cezasını çeke.
