Link açıqlığı

Advokatlar Qırımtatar halqı lideriniñ oğlu Hayser Cemilevniñ azat etilmesine Rusiyedeki Ukraina konsul hızmetlerini celp etmek isteyler. Bunı noyabr 22-de mahküm etilgenniñ Rusiye advokatı Nikolay Polozov Qırım.Aqiqatqa bildirdi.

Onıñ aytqanına köre, bunı Cemilevler qorantasınıñ onı azatlıqqa çıqqan soñ Kyivge ketirme planlarınen bağlı risklerni eksiltmek içün yapacaqlar.

«Hayser ketecek hızmet naqliyatında konsullar apishanege kelecek. Bu naqliyat baqılmay ve toqtatılmay. Ümüt etem ki, Rusiye uquq qoruyıcıları oña qarşı provokatsiyalar yapmaycağınıñ küçük kefili olacaq», – dep ayta advokat.

Polozovnıñ qayd etkenine köre, Hayser Cemilevge Rusiyeni terk etmege yasaq etile bile, çünki oña nisbeten üç yıllıq memuriy nezaret kirsetildi. Bundan ğayrı, advokat Rusiyede mahküm etilgenge qarşı cinaiy iş açılacağını red etmey.

«Hayserge qarşı yañı iş açılacağını red etmege mümkün degil. Misal olaraq, apishanede bir şey hırsızladı ya da saqçığa ücüm etti. O, azat etilgen soñ da provokatsiyalar ola bile. Birisi çapıp kelir, patronı atar, onı tekrar yaqalamaq içün sebep olur. Hayser azat etilecek vaqıt Rusiye uquq qoruyıcı organlarınıñ hadimlerini yaqınlaştırmamaq kerek», – dep ayta Nikolay Polozov.

Onıñ bildirgenine köre, Hayser Cemilevge Ukrainağa çıqmağa izin berilmese, onı Rusiyedeki ukrain konsullığına alıp ketecekler ve mesel al etilgenine qadar o anda qalacaq.

Hayser Cemilevniñ apis cezası cumaertesi künü, noyabr 26-da, soñuna kele, amma Rusiye qanunlarına köre, onı soñki iş künü, yani cuma künü, noyabr 25-de azat etmek kerekler.

Hayser Cemilev 2013 senesi mayısta Bağçasaraydaki eviniñ azbarında babasınıñ silâsından qoranta tanışı Fevzi Edemovnı öldürmesi ile qabaatlana. Qırım işğalinden soñ Rusiye taqiqat organları işni ğayrıdan taqiq etmege qarar alğan edi. Hayserni Aqmescit SİZOsından Krasnodar ülkesine alıp kettiler.

Hayser Cemilev Astrahanniñ №10 apishanesinde cezasını çeke.

Rusiye mahkemesi sentâbr 15-de Hayser üç yıl devamında memuriy nezaret altında olacağını belgiledi. Çıqarılğan qararğa binaen, Hayser Cemilev Qırımdan çıqamaz, saat 22-den saba saat 6-ğa qadar Bağçasaraydaki yaşağan yerinden çıqamaz, işnen bağlı allar istisna ola. Cemilevniñ oğlu ayda eki kere «yaşağan yeri ya da qayd olğan yerniñ içki işler organına kelmege» mecburdır.

XS
SM
MD
LG