Link açıqlığı

Sürgün olunğan qırımlı Nedim Halilov oña vatandaşlıqsız şahıs statusı berilmesini, milleti qırımtatar olğanı qayd etilmesini ve Aqmescitke qaytarılmasını talap ete. Halilov açlıqnı ilân etip, müessise reberiyetini haberdar etti.

«2016 senesi noyabr 21-den itibaren qısmen açlıqqa başlayım: ötmek ve suvğa keçem. Talaplarım yerine ketirilmese, 3 künden soñ, 2016 senesi noyabr 24-den başlap tolu açlıqqa keçecem», – dep aytıla faalniñ Facebooktaki beyanatında.

Halilov Qırım.Aqiqatqa bildirgenine köre, o, Krasnodar ülkesindeki çetel vatandaşlarını vaqtınca tutuv mahsus müessisesinde (ÇVVTMM) buluna. Onıñ aytqanına köre, ÇVVTMM reberiyeti vatandaşlıq malümatını almaq içün Özbekistan ve Ukrainağa muracaat etti. Faal Özbekistan onı qabul etmez ve «onı qayda yollaycaqlarını bilmegeninden» qorqa. Halilovnıñ qayd etkenine köre, onıñ 1986 senesinden berli Qırımda oturğanına dair delilleri bar, aynı vaqıtta o Ukraina vatandaşlığını qabul etmedi ve Özbekistan vatandaşlığından vazgeçken edi.

«Bugün (açlıq – QA) haberini Rusiye Federatsiyasınıñ prezidenti ve insan aqları vekâletlisine yollamağa tırışam. Saat 10-dan berli bunı yapmağa bermeyler, vesiqalarımnı qabul etmeyip, vekâletli kişi yoq deyler, de 11-ge, de ekige yollaylar», – dep ayttı Halilov.

Faal qayd etti ki, Qırımdaki vaziyetten sebep o şahsiy şirketsiz qaldı ve «qorantasınen munasebetleri zorlaştı».

2016 senesi yazda «Qırımtatarlarnıñ qarşılıq areketi» teşkilâtınıñ koordinatorı Nedim Halilov halqara uquq ve Rusiye qanunlarına esaslanıp, Rusiye kontrol etken Aqmescit Merkeziy mahkemesine Rusiyeniñ Qırımdaki qırımtatarlarğa qarşı yapqan areketleriniñ qanunsız tanılması içün muracaatta bulundı. O, qırımtatar tiline devlet tili statusınıñ berilmesini ve mahkeme oturışını qırımtatarca alıp barmağa talap etti.

Rusiye akimiyeti bunı izaatlamay.

XS
SM
MD
LG