Link açıqlığı

Noyabr 21, bazarertesi künü Kreml nezaretindeki Qırım Yuqarı mahkemesinde «Çiygoznıñ işi» boyunca 43-cü mahkeme oturışı keçirildi. Toplaşuvda qabaatlayıcı tarafnıñ daa üç şaatı sorğudan keçti. Bunı rusiyeli advokat Nikolay Polozov Facebookta yerleştirilgen video-muracaatında bildire.

Advokatnıñ sözlerine köre, sorğudan birinci keçken – Nagornıy Yüriy Grigoryeviç – ortodoks kilseniñ cemaatına ait olğanını bildirdi. Ekinci şaat Kezlevde politsiya yolbaşçısınıñ muavini Pugaç İgor Vladimiroviç oldı. Üçünci soraştırılğan şaat – Pogorodniy degen biri, o Sudaq kazak cemiyetiniñ atamanı ola. İfade bergenlerniñ iç biri Ahtem Çiygoznı 26 fevral vaqiaları devamında körmedi, dep bildirdi Polozov.

Nevbetteki mahkeme toplaşuvı, advokatnıñ malümatına köre, 22 noyabrde saat 9:30 başlanacaq.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

XS
SM
MD
LG