Link açıqlığı

Kyivte keçirilgen toplaşuvda 14 qırımtatar din cemiyeti öz müftiyatını teşkil etti. Bunı Qırım.Aqiqatqa qurultay iştirakçisi, «Evkaf Ukraina» hayriye fondunıñ yolbaşçısı Zevri Kurbedinov bildirdi.

Onıñ sözlerine köre, toplaşuvda müftiy vazifesine Ayder Rustamov saylanıldı, o Kyivdeki Qırımtatar cemiyetinde maneviy qıymetler Komitetini idare ete edi.

Bundan da ğayrı, toplaşuv iştirakçileri Ulema Şurasını teşkil etti, onıñ yolbaşçısı Ukraina Musulmanlar Birliginiñ yolbaşçısı Suleyman Hayrullayev oldı.

«Tek bir sual munaqaşalı oldı – kim idare etecek: qurultay Ulema Şurasını idare etecekmi ya da Ulema Şurası diniy suallerni özü çezecekmi? Muzakereler ötkerilgen soñ er kes, Şura diniy suallerni, şeriatqa köre, özü çezmek kerek olğanınen razı oldılae», – dep qayd etti Kurtbedinov.

O qıtaiy Ukrainada qırımtatar müftiliginiñ kerekligini, yarımadada qalğan Qırım ve Aqyar musulmanları diniy idaresi Rusiye kontrolündeki yerli akimiyetnen işbirlikke keçkeninen añlata. «Olar işbirlikçi oldılar, olarnı saylağanlarnıñ menfaatına, müminlerniñ menfaatına çalışmaylar ende», – dedi Kurtbedinov.

O qayd etti ki, qırım musulmanlarınıñ Ukrainanıñ qıtaiy qısımında yañı teşkilâtınıñ birinci maqsatları – musulmanlar içün diniy tasilini teşkil etmek ve camiler qurmaq.

Qırım musulmanları diniy idaresiniñ nizamnamesi Ulema şurasınıñ 11 daimiy azası saylanılmaq kerek olğanını belgiley. Kyivte keçirilgen tesis toplaşuvında beş daimiy aza ve üç muvaqqat aza saylanıldı.

Müfti eki yılğa saylanıldı ve sıñırsız qadar ğatırdan saylanıla bile. Qırımtatar musulman cemiyetleriniñ temsilcileri nevbetteki sefer Kyivte 24 dekabre toplaşacaqlar. O toplaşuvda Ulema Şurasınıñ daa altı azası ve müfti muavini saylanılacağı belgilene. Şurağa qırımtatar milliy areket vekilleri de qoşulmaq kerek.

Qıtadaki qırımtatarlarnıñ müftisi Ayder Rustamov arap tili ve şeriatnı El-Beyt (Urdun) üniversitetinde ögrendi. Üniversitetni bitirgen soñ Ukrainada diniy kitaplarnıñ tercimesinen oğraştı. 2015 senesinden berli Kyivte Qırımtatar cemiyetinde maneviy qıymetler Komitetini idare ete edi.

Ulema Şurasınıñ yolbaşçısı Suleyman (Elimdar) Hayrullayev Muhammad ibn Saud adına (Er-Riyad, Suudi Arabistan) İslâm üniversitetinde tasil aldı. 2014 senesinden berli Ukraina Musulmanlar Birliginiñ reisi ola.

Çeşit menbaalarğa köre, Ukrainanıñ qıtaiy qısımında, Qırım işğalinden soñ yarımadanı terk etken, 15-25 biñ qırımtatarı yaşay.

XS
SM
MD
LG