Link açıqlığı

Çubarov SBU hadimlerini Ukrainadan Rusiye vatandaşlarını teslim etip FSB ile işbirlik yapqanlarında qabaatladı


Qırımtatar Milliy Meclis reisi, Yuqarı Rada deputatı Refat Çubarov, Ukraina Telükesizlik (SBU) hızmetini, Rusiye Federal Telükesizlik hızmeti (FSB) ile işbirlik yapıp, rusiyelilerni teslim etkeninde qabaatladı. Bunı o noyabr 18 künü Yuqarı Rada İnsan aqları, milliy azlıqlar ve milletlerara munasebetler komitetiniñ toplaşuvda beyan etti, dep bildire Qırım.Aqıqat muhbiri.

O, toplaşuvğa davet etilgen SBU vekillerine: «Siz FSB ile iş tutasız», – dedi.

Çubarov SBU tarafından Rusiye vatandaşı olğan Ruslan Meyriyevke basqı yapılğanını qayd etti. Al azırda Meriyev ruhsetsiz sila saqlağanında qabaatlanıp Zaporojyedeki epishanede bulunıp, teslim etilecegine azırlana.

«Ne içün oña (Meyriyevke - QA) qarşı alâ daa resmiy qabaat bildirilmedi? Ya da onı qabaatlap, taqiqatnı alıp barıñız, qabaatını isbatlañız ve Ukrainada mahküm etiñiz, ya da azat etip onı yiberiñiz, apiste tutmañız», – dedi Çubarov toplaşuvda bulunğan SBU vekillerine.

Çubarov qayd etti ki, Ukraina akimiyet organları işğal etilgen Qırımda Ukraina vatandaşlarını apske atqan FSB vekillerine iç te işanmaq mumkün degil.

«Rusiyeke şimdi iç bir kimseni teslim etmege mümkün degil. Akis alda Cemilevni, Çubarovnı teslim etiñiz…», – dep qoştı o.

Çubarovnıñ sözlerine köre, o Ukraina Devlet icret hızmeti Meyriyevke Ukrainada sığınaq bermege razı olmaycağı aqqında azırlanılğan qarardan endi haberdar. Çubarov, böyle qarar SBU tevsiyelerinen azırlanılğanında emin olğanını bildirdi. O hatırlattı ki, Qırım Rusiye tarafından işğal etilmezden ögüne Meyriyev Qırımda yaşay edi ce Ukrain hızmetleri Meyriyevke qarşı iç bir itiraz bildirmey ediler.

Meclis yolbaşçısı SBU tarafıntan Rusiye vatandaşı Şahban İsakovnıñ bu sene avgust ayında yaqalanğanını da hatırlattı. İsakov Rusiyede FSB tarafından, qanunsız silâlı şekillenüvde iştirak etkeninde qabaatlanıp, qıdırıla. Çubarov İsakovnıñ yaqalanuvı vaqıtında yapılğan bir-çoq qanun bosuvları aqqını qayd etti. Bu bozuvlar sebebinden Kyiv vilâyetiniñ apelâtsion mahkemesi onı azat etti.

«Qapatıluv müddeti bitken soñ, ellerinden kelepçelerini alıp taşlaylar, pasportnı qaytaralar. Ve aynı şu yerde kene pasportını tutıp alalar ve, kelepçelerini taqıp, apiske taşlaylar», – dedi Çubarov.

O qayd etti ki, Rusiye FSB hadimleri işğal etilgen Qırımda 21 qırımtatarını ekstremizmde qabaatlap apiske aldı.

Çubarov, SBU hadimlerine baqıp: «Biz bunnen oğraşamız, biz olar içün bir şeyler yapmağa tırışamız, siz degil», – dedi.

Çubarov toplaşuvda iştirak etken deputatlarğa, Ukrainadan Rusiyege teslim etmek talapları ile FSB tarafından kelecek muracaatlarnı nezaret etecek, mahsus iş gruppasını teşkil etmege teklif etti. İnsan aqları, milliy azlıqlar ve milletlerara munasebetler komitetiniñ toplaşuvda bulunğanlarnıñ ekseriyeti bu teklifke qol tuttılar.

XS
SM
MD
LG