Link açıqlığı

«Hizb ut-Tahrir davasınıñ» iştirakçisini psihiatrik hastahanege alıp kettiler – ömür arqadaşı


Yaltada «Hizb ut-Tahrir» davası çerçivesinde yaqalanğan altı insandan biri Müslim Aliyevni psihiatrik hastahanege yolladılar. Bunı noyabr 17-de yaqalanğannıñ ömür arqadaşı Naciye Aliyeva Qırım.Aqiqatqa bildirdi.

«Onı (Müslim Aliyevni – QA) bugün psihiatrik hastahanege avuştırdılar. Anda ne qadar qalacağını bilmeyim, oña ne yapılacaq belli degil, taqiqat tenbiyelemedi», – dep ayttı Aliyeva.

Ömür arqadaşınıñ bildirgenine köre, yaqalanğan altı kişini «psihiatrik hastahanege subetke endi alıp ketken ediler».

«Tekrar subet olacağını aytqan ediler, amma bu sefer adiy bir subet olmaycağını añladıq», – dep qayd etti Aliyeva.

Noyabr başında Qırım advokatı Edem Semedlâyev bildirdi ki, «Hizb ut-Tahrir» davasında qabaatlanğanlarğa mecburiy psihiatrik ekspertiza yapılacaqtır.

«Hizb ut-Tahrir» davasınıñ Yaltalı iştirakçileri yarım yıldan ziyade apiste yata. Birinci dört kişi 2016 senesi fevral 11-de yaqalanğan edi. Olarnıñ arasında İnsan aqları bağ gruppasınıñ azası Emir-Üsein Kuku da bar. Ondan ğayrı qurucılıqnen oğraşqan Aluşta sakini Müslim Aliyev ve Qızıltaş köyüniñ sakini Enver Bekirov, ve Yaltalı çeçek satıcısı Vadim Siruk da yaqalanğan edi.

Uquq qorçalayıcılar apiske alınğan Yalta sakinlerini siyasiy mabus olaraq tanıy.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.

XS
SM
MD
LG