Link açıqlığı

Advokat: «Hizb ut-Tahrir» davasınıñ iştirakçilerinden birini psihiatrik ekspertizağa alıp kete bileler


Emil Kurbedinov

Yaltada «Hizb ut-Tahrir» davası boyunca apiske alınğan altı insanlardan birini psihiatrik hastahanege mecburiy ekspertizadan keçmesi içün yolladılar. Bunı Qırım advokatı Emil Kürbedinov Facebook saifesinde bildirdi.

«Al-azırda bu malümatnıñ tasdıqlanması ya da red etilmesini bekleymiz. Ceza kodeksiniñ 205.5 maddesi 1-nci qısmı boyunca, «Hizb ut-Tahrir davasında» qabaatlanğan, Yalta ve Aluştada apiske alınğan altı insandan biri Müslim Aliyevni psihiatrik hastahanege alıp kettiler, mecburiy ekspertizanı yapa bileler», – dep yazdı advokat.

Kürbedinovnıñ aytqanına köre, Müslim, digerleri kibi, İlmi Ümerovğa qoltutıp, ekspertizağa razı olmadı.

«Tahminlerimizge köre, FSB altı qırımtatar musulmanına nisbeten kütleviy ceza psihiatriyasını kerçekleştirmege başladı. 21 asırda insanlarnı fikirleri ve siyasiy baqışları içün psihiatrik hastahanege almağa olmaz. Rusiyeniñ farqlı tüşüngen qırımtatar musulmanları ile küreşniñ bütün sıñırları endi bozuldı», – dep ayttı Kürbedinov.

Advokatnıñ fikirince, İlmi Ümerov örneginde dünya toplulığı «NKVD ve KGBniñ canlanğan usullarında noqta qoyıp, kütleviy psihiatrik tedbirler ve taqiplerni toqtatmaq kerek».

Noyabr başında Qırım advokatı Edem Semedlâyev bildirdi ki, «Hizb ut-Tahrir» davasında qabaatlanğanlarğa mecburiy psihiatrik ekspertiza yapılacaqtır.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı. TİN halqara toplulıqqa muracaat etip, Rusiye insan aqları ve ifade serbestligini bozmasın, ukrain siyasiy mabusları ve esirlerini azat etsin dep, oña qarşı bütün uquqiy ve siyasiy basqı usullarını qullansın istedi.

XS
SM
MD
LG