Rusiye Telükesizlik şurasınıñ reisi Nikolay Patruşev yaqınlarda Montenegro devletinde yapılğan devirim ıntıluvı içün afu soradı. O dedi ki, resmiy Moskva devirimcilerniñ areketlerinden haberdar degil edi. Bunı britaniyalı The Guardian gazetası, Sırbistan akimiyetindeki öz menbaalarına atıf etip, haber ete.
Menbaanıñ malümatına köre, Patruşev oktâbrniñ soñunda Belgratqa kelgeni vaqıtta, Montenegro akimiyeti devirim ıntıluvınıñ kestirilgeni aqqında beyan etken soñ afu soradı.
The Guardian bildire ki, Sırbistan rusiyeli bir taqımnı sürgün etti. O taqım 16 oktâbr Parlament saylavlarından soñ Montenegro baş naziri Milo Đukanovićke suiqast etmege niyetli edi.
Bundan ögüne Kremlinde, resmiy olaraq Moskva Montenegrodaki devirimniñ azırlanuvına alâqalı olmağanını beyan etken edi. The Guardiandaki bildürüv boyunca izaatlar şimdilik daa yoq.
Keçken bazar künü Montenegro mahsus savcısı Milivoje Katnić, memlekette toqtatılğan istiqrarsızlıq ve akimiyetniñ zapt etüv ıntıluvında rusiyeli milletçiler ve sırb radikalları iştirak etkenini bildirgen edi.
