Link açıqlığı

Zapt etilgen Aqmescitte «La Bottega» tükânında teşkerüvinden soñ Kremlinge bağlı Rusiye köy hocalıq nezaret hadimleri 43,6 kilo penir ve 4,5 kilo qolbaslarnı tutıp aldılar. Bunı noyabr 10 künü müessiseniñ matbuat hızmeti bildire.

«Añılğan mahsulatlar boyunca saipler tarafından veterenar sertifikat ve resmiyleştirüv vesiqaları aqqında malümat berilmedi, ondan da ğayrı malğa refaqat vesiqaları ve rus tilinde işaretleme de yoq edi», – aytıla matbuat hızmetiniñ bildirüvinde.

Matbuat hızmetiniñ malümatına köre, mahsulatlar satılıştan alındı ve «Brener 500» furunında yaqılıp yoq etildi.

Qomşu Rusiyede ve işğal etilgen Qırımda aşayt mahsulatlarına ve köy hocalığınıñ çıqarğan mahsulatına yaptırımlar kirsetildi. İtalniñ sıñırlanması – evel Qırımnıñ işğal etilmesi ve Ukrainanıñ şarqiy bölgelerine tecavuz etkeni içün Moskvağa qarşı sanktsiyalnı qullanğan bir sıra devletlerge qarşı qabul etildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG