Link açıqlığı

Saatnıñ esas haberi

Polozov: FSB taqiqatçısı meni Ümerov davasınıñ şaatı olaraq sorğuğa çekecek ola


Nikolay Polozov. Arhiv fotoresimi
Nikolay Polozov. Arhiv fotoresimi

Qırımnıñ Yuqarı mahkemesinde noyabr 8-de advokat Nikolay Polozovnı Qırımtatar Milliy Meclisiniñ reis muavini İlmi Ümerovnıñ davasında şaat olaraq sorğuğa çekme işi boyunca toplaşuvı olıp keçti. Bunı advokatnıñ özü Twitterde saifesinde bildirdi.

«Mahkeme FSB ve prokurornıñ muracaatlarını qabul etip, işimni birinci instantsiaya mahkemesine baqmağa yolladı. İşim İlmi Ümerovnıñ davası ile bağlı. FSB taqiqatçısı meni imayeci statusından marum etip, meni şaat olaraq sorğuğa çekecek ola», – dep yazdı Polozov.

Polozovnıñ aytqanına köre, Qırımda «FSB İlmi Ümerovnı qanunsız alda imayesiz qaldıracaq ola ve advokatqa basqı yapmağa tırışa».

«Ümerov aqqında bilgen malümatlarım advokat sırı ile imaye etilgen, olarnı uquqiy yardım köstergende aldım. Prokuratura ve FSB bunı bileler. Amma bu bir manaçıqtır. FSB ve prokuraturanıñ esas maqsadı – meni Qırımda insan aqlarını qorçalamaq imkânından marum etip, qorquzmaq istegidir», – dep qayd etti advokat.

Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.

Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.

Sentâbr 7-de İlmi Umerov klinikadan çıqtı.

Oktâbr 20-de Umerovğa tanış olmaq içün lingvistik ve psihiatrik-mahkeme ekspertizalarınıñ neticeleri kösterildi.

XS
SM
MD
LG