Link açıqlığı

Vinnitsadaki telekompaniya qırımtatarlar aqqında vesiqalı filmni çıqaracaq


«Krım» göñülliler batalyonınıñ sabıq komandanı İsa Akayev, 2015 senesi oktabr 6 künü

«Vinnitsa» şahsiy telekompaniyası qırımtatarlarnıñ sürgünligi ve Rusiye işğalinden soñ Qırımnı terk etmege mecbur olğan insanlar aqqında vesiqalı filmni çıqaracaq. Bunı «Vetan» vatandaş birleşmesiniñ faali Taisa Gayda Qırım.Aqiqatqa bildirdi.

Onıñ aytqanına köre, film ğayesi «Krım» göñülliler batalyonınıñ sabıq komandanı İsa Akayevge ait, stsenariyni «Vinnıçına» telekanalınıñ baş muarriri Aleksey Litvinov yaza.

«İsa ukrainler qırımtatarlarnıñ soñki 70 yıl devamında yaşağanını bilmey, bu sebepten çeşit türlü fikirler bar. Ayrı insanlarnıñ ikâyeleri bunı kösterecekmiz», – dep ayttı Gayda.

Onıñ bildirgenine köre, filmde üç nesil qırımtatarlarınıñ ikâyeleri ve Qırımdan sürgünlik zamanlarınıñ vesiqalı levhaları qullanılacaqtır. İşğalden soñ Qırımnı terk etip Vinnitsa, Herson, Kyiv ve Lvivde yaşağan qırımtatarlar da çıqarılacaq. Tahminen 30 daqqa devam etecek filmniñ ilk büceti – 150 biñ grivnadır. Gaydanıñ aytqanına köre, film çıqarılmasına para toplana.

«Vinnitsa yolbaşçılığı Vinnitsa vilâyetinde çıqarılacaq levhalarğa para ayırdı. Dört şeerde çıqaracaq olamız, amma paramız yoq, hayriye fondlarına muracaat etemiz. Vinnitsada çıqarılğan levhalar esasında qısqa leyha yapıp, qıdırmağa devam etecekmiz», – dep qayd etti filmniñ prodüseri Gayda.

2014 senesi mart ayından başlap Vinnitsa ve Vinnitsa vilâyetinde bir qaç yüz qırımtatarı yerleşti. Aynı yılda köçip kelgenler «Vetan» cemaat birleşmesini qurdılar. Vinnitsa şeeriniñ yolbaşçılığı birleşmege tamir etilecek binanı berdi.

XS
SM
MD
LG