Link açıqlığı

Saatnıñ esas haberi

Polozov Rusiyede Hayser Cemilevge qarşı yañı cinaiy iş açılacağından qorqa


Qırımtatarlarnıñ lideri Mustafa Cemilevniñ oğlu Hayser Cemilevge qarşı Rusiyede yañı cinaiy iş açıla bile, dep paylaştı qorqusını Rusiye advokatı Nikolay Polozov «Gromadske radio» efirinde.

«Hayserniñ apis cezası soñuna kelmekte. Rusiye akimiyeti bu esirni qolay-qolay yibermeycek ve onı qaldırmağa tırışacağından qorqam. Yañı cinaiy iş açıla bile – Hayser bir şeyler yaptı ya da apishanede bir şey hırsızladı kibi. Onı apishaneden azat etip, cebine patronlarnı qoymağa kimse keder etmey – soñra kelip, baqıñız, kene qollarına silâ aldı derler», – dep ayta Polozov.

Onıñ qayd etkenine köre, Rusiye Hayserni «reine olaraq, qırımtatarlarnıñ lideri olğan babasına basqı aleti olaraq qullandı».

İyün 23-te Ukraina Adalet nazirliginde bildirdiler ki, müessise İnsan aqları boyunca Avropa mahkemesinde Hayser Cemilevniñ adliyecileri bergen davağa qoşuldı. 2015 senesi iyül 10-da İnsan aqları boyunca Avropa mahkemesi Hayser Cemilevniñ işi boyunca qarar çıqarıp, onı SİZO-dan azat etmege talap etti, bunen beraber, Rusiye Federatsiyasını ukrain kişiniñ sağlığına zarar ketire bilecek areketlerni yapmamağa mecbur etti.

Hayser Cemilevni 2013 senesi mayıs 27-de onıñ Bağçasaraydaki evinde yaqalap, o yerde 44 yaşındaki Fevzi Edemovnı babasınıñ tüfeginden öldürgeninde qabaatladılar. Qırım işğal etilgen soñ rusiyeli taqiqat organları onıñ işini yañıdan baqmağa qarar aldı. Hayserni Aqmescit apishanesinden çıqarıp, Krasnodar vilâyetine alıp kettiler.

Rusiye Federatsiyasınıñ Yuqarı mahkemesi Krasnodar ülkesiniñ mahkemesi Hayser Cemilevge bergen 5 yıllıq apis cezasını bir buçuq yılğa qısqarttı. Kiyevniñ Dnepr mahkemesi 2015 senesi aprel ayında onı 3 yıl ve 8 ayğa qadar apiske almağa qarar aldı.

Hayser Cemilev 10 sanlı Astrahan apishanesinde buluna.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.


XS
SM
MD
LG