Soñki vaqıtları Qırımda tolerantlıq, milletlerara barışıq ve amanlıq lafları pek mod oldı. Özüm içün bu neni ifadelegenini añlamağa tırıştım.
Mence, er daim tolerantlıq aqqında aytqanlar halqlarnıñ bu vaziyetini köreler, insanlarnıñ medeniy ve tarihiy mirası yoq etile, bu halqlar ise tiz çökip, külümsire-külümsire şu varvardan daa bir tarihiy hiyanetlik yapmağa rica eteler.
Qırımdaki milletlerara amanlıq – tamır halqlarnı yoq etken zalımlar abideleriniñ tiklenmesidir: Çeçenistanda Yermolovğa, Qırımda Ekinci Yekaterina ve Potemkinge, Sibirde Yermakqa, Ayvan Groznıy ve onıñ kibi soylarına.
Qırımdaki milletlerara amanlıq – tamır halqlarnı yoq etken zalımlar abideleriniñ tiklenmesidir
Qırımdaki dinlerara amanlıq – musulmanlar toplu yaşağan yerlerde dinsizler tarafından diger din timsalleriniñ tiklenmesidir.
Dinlerara amanlıq – imamlar «uquq qoruyıcı» organlarğa ibadet etmege kelgenlerniñ adlarını aytmağa mecbur olğan vaqıt. Silâlı insanlar camilerge kire, kirli çızmalarınen camilerimizni taptap çıqalar.
Dinlerara amanlıq – bes-belli, sarhoş biri musulmanlarnı «Hristos Voskres» sözlerinen hayırlay, «Allahu Akbar» ibaresi ise terroristik bir şey sayıla!
Qırımdaki kerçek vaziyet böyledir.
Ana-babalarımız çoq şey kördi, İn şa Allah, biz de bunı yeñip olurmız!
Zair Smedlâyev, Qırımtatar Milliy Qurultayı Merkeziy saylav komissiyasınıñ reisi
«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün