Link açıqlığı

Saatnıñ esas haberi

Qırımda beş qırımtatarı boyunca mahkeme itirazları oktâbr 27 künü baqılacaq


Arhiv resimi: Qırım, Mamaqta qıtımtarlarda 12 oktâbr 2016 senesi keçirilgen tintüv
Arhiv resimi: Qırım, Mamaqta qıtımtarlarda 12 oktâbr 2016 senesi keçirilgen tintüv

Kremlin kontrolü astındaki Qırım Yuqarı mahkemeside oktâbr 27 künü «Hizb ut-Tahrirde» iştirak etkenlerinde qabaatlanğan beş qırımtatarınıñ apis etilmesine qarşı itirazlar baqılacaq. Bunı Facebookta advokat Emil Kurbedinov bildirdi.

«27 oktâbrde saat 13-te Qırım cumhuriyetiniñ Yuqarı mahkemesinde «Hizb ut-Tahrir» işi boyunca Aqmescitte apis etilgen beş qırımtatarı boyunca itiraz şikâyetleri baqılacaq», – dep yazdı advokat.

Oktâbr 12-de Qırımda beş musulman qorantasınıñ evinde tintüv keçirildi. Beş qırımtatarı Rusiyede yasaq etilgen «Hizb ut-Tahrir» teşkilâtında iştirak etkenleri qabaatınen yaqalandı: Rustem İsmailov, Abdullayev Uzair, Abdullayev Teymur, Cemadinov Emil, Saledinov Ayder.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG