Link açıqlığı

Mahsus Qırım.Aqiqat içün

Qırım müftiyligi yarımada musulmanlarını «doğru» ve «yañlış» soylarına bölip, semetdeşlerinden açıq-aydın yüzüni çevirdi. «Rusiye islâmına» er angi şekilde zıt kelgen ya da diniy idareniñ yolbaşçısı Emirali Ablayevniñ areketlerine qarşı çıqqanlar «inanmaycaqlar» sırasına kirsetile. İlk evelâ, Rusiye uquq qoruyıcılarınıñ fikirince, «Hizb ut-Tahrir» teşkilâtınıñ mefküresine qoltutqan qırımtatarlar zarar köre.

Qırımda repressiyalarnıñ daa bir basamağı başladı. Tahmin etkenim kibi, Rusiye uquq qoruyıcıları ve yerli memuriyet qırımtatarlarğa daa çoq basqı yapa. Yarımadada yañı qanunsız tintüv, yaqalav ve apis cezaları qayd etildi. Qırımtatar qorantaları zarar kördi, olar, FSB malümatına köre, «Hizb ut-Tahrir» diniy-siyasiy teşkilâtınıñ faaliyetinde iştirak eteler. Rusiye akimiyeti teşkilâtnı terrorist bir teşkilât dep adladı. Areket ne qadar faaliyet kösterse de, iç bir vaqıt insannıñ ayatı ve sağlığına zarar ketirecek bir şey yapmadı. Ukrain Qırımında «hizb» mefküresi 90-ıncı yıllarnıñ soñlarında peyda olmağa başladı. 2004-2006 seneleri eñ faal edi, faalleri ve tarafdarları Orta Asiyadan qaçmağa başlağan edi. Hilâfet tarafdarları iman etkenlerniñ çoqusı hristian olğan bir memlekette ne içün areket ete sualini şimdilik çette qaldırayıq. Müimi şu ki, soñki on beş yıl içinde yarımadada diniy sebeplerden bir de bir patlav ve qanlı çatışma olmadı. Qırımda «terrorizm» Rusiye ordusı ve mahsus hızmetlerinen beraber peyda oldı.

Rusiyeniñ ceza maşinası teşkerilgen bir stsenariy boyunca areket ete. Qırımtatarlarnıñ bombaları ve silâsı tapılmasa da, olarğa «terrorist» dediler

Rusiyeniñ ceza maşinası teşkerilgen bir stsenariy boyunca areket ete. Qırımtatarlarnıñ bombaları ve silâsı tapılmasa da, olarğa «terrorist» dediler. Mahkemede yekâne «delil» provokatorlarnıñ bergen malümatları ve telefon subetleriniñ qaydları olacaqtır. Eski işlerge köre, «taqiqatnıñ» başqa bir şeyi yoq. Qırımda insanlarnı musulman yaşayışı ve dünya islâm devletini qurma lafları içün ura ve apiske atalar. Qırımtatar satqınları yuqarıdan berilgen emirge köre, taqiqat «hizblerniñ» faaliyetine «açuvlanğan» semetdeşleriniñ ricasından yapıldı, dep bildire.

Uquq qoruyıcılarınıñ öz cizvit mantığı bar. Federal merkez qırımlılarnı er daim qorquda tutmaq kerek. FSB, politsiya ve diger «organlarnıñ» hadimlerine mukâfat, vazifelerde yükseliş ve yañı rutbeler kerektir. Olar «terrorizm» boyunca bunıñ kibi işlerni basa-bas açmağa azırlar, çünki iş odasından çıqmayıp, bir sıra rağbet alma imkânlarını qazanalar. Köteklengenlerni urmaq ve qorquzılğanlarnı qorquzmaq – çoq aqıl ve tecribe olmasını talap etmey.

Qırım müftiyliginiñ resmiy yüzleri dindaşları ve semetdeşlerini utanmayıp sattı, dep aytmaq mümkün. Bundan evel QAMDİ yarımadada bir şey olmay kibi yanaşıp, tehnik meseleler aqqında aytsa da, şimdi açıq sürette «akimiyetniñ» yapqanlarına qoltutqanını bildire. Bu sefer müfti muavini Esadullah Bairov semetdeşleriniñ ögünde masqara oldı. O, yarımadada tintüvler keçirilgenini tanıp, dindaşlarından «muqayt olmalarını» rica etti.

«Şeklengenler FSB taqiqat komitetine alıp ketirildi. Maalesef, uquq qoruyıcılarnıñ bildirgenine köre, tintüv vaqtında «Hizb ut-Tahrir» teşkilâtı ile bağlı edebiyat, malümat, malümat taşıyıcıları tapıldı. Teşkilât Rusiyede yasaq altında buluna ve terroristik bir teşkilât sayıla. Bu sebepten şu firqanıñ bölükleri qanun tarafından taqip etilmekte. Bizler bütün musulmanlarnı bu teşkilât ile diqqatlı olıp, özüni ve qorantalarını qorçalamağa çağıramız», – dep ayttı Esadullah Bairov.

Eki yüzlülik ve demagogiya çetke qaldırılsa, «muqayt olmaq» ibaresi qırımtatarlarnıñ bir-birine qarşı çıqması manasına kele

Eki yüzlülik ve demagogiya çetke qaldırılsa, «muqayt olmaq» ibaresi qırımtatarlarnıñ bir-birine qarşı çıqması manasına kele. QAMDİ tanışlar ve dostlarnen islâm aqqında laf etmemege tevsiye ete. Belki, yarın olarğa tintüv keçirmege kelirler, sizni ise başta şaat, soñra ise «yardım etken» dep adlandırırlar. Namazdan soñ müminler qave içip, farqlı meselelerni muzakere etmemeli, evlerine dağılmalı. «Muqayt ol» çağıruvı «hilâfet» sözüni bir kere telâffuz etken insannı evge davet etmemek manasına kele. Ne kibi kontekst içinde qullanılğanı müim degil. Belki, o, «Hizb ut-Tahrir» tarafdarlarınen aynı fikirde. Ya onı diqqatlı vatandaşlarnıñ bergen malümatına köre apiske alsalar. Sizni işke «bağlamasalar» da, işte problemler çıqa bile.

Qırım müftiyligi dedi ki, yarımadada qırımtatarlar uzaq turacaq «yañlış» musulmanlar bar. «Yañlışlarnıñ» çizgileri pek añlaşılmay. Tecribe köstere ki, «Hizb ut-Tahrirniñ» faal tarafdarı ya da istegine köre islâm dininiñ esaslarınen meraqlanğan insan arasında tam bir hane sızmaq qolay degil. İşbu teşkilât özüni siyasiy firqa olaraq tanıtsa da, aza biletleri kimsege berilmey. QAMDİ qırımtatar cemaatını aselet bozıp, semetdeşler arasında işançsızlıq doğura.

Sergey Stelmah, siyasiy közetici

«Fikir» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün

XS
SM
MD
LG