Link açıqlığı

Saatnıñ esas haberi

Qırımda qırımtatarlarnıñ evlerinde tintüvler keçirildi, yaqalanğanlar bar – Smedlâyev


Qırımda oktâbr 12-de qırımtatarlarnıñ evlerinde tintüvler olıp keçti. Qırım siyasetşınası Eleonora Dülber Facebook saifesinde sabadan Rusiye uquq qoruyıcıları kelgen insanlarnıñ adlarını ve yaşağan yerlerini yazdı.

«Tintüv keçirilgen qırımtatarlar cedveli: Rustem İsmailov, 32 yaşında, Boğurça (Kamenka), Abdullayev Uzair, 42 yaşında, Mamaq (Strogonovka), Abdullayev Teymur, 41 yaşında, Mamaq (Strogonovka), Cemadenov Emil, Saledinov Ayder», – dep bildirdi Dülber.

Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebookta bildirdi ki, tintüv keçirilgen soñ Ayder Saledinov FSB idaresine alıp ketirildi.

Advokat Emil Kürbedinovnıñ Facebookta bildirgenine köre, tintüv keçirilgen bazı qırımtatarlar Mekkege acılıqqa barğan edi.

«Tintüvler din kütken qırımtatar musulmanlarınıñ evlerinde keçirile, olar yaqında acılıqqa barğan ediler, – demek ki, iş «Hizb ut-Tahrir» teşkilâtında iştirak etme qabaatınen bağlı olacaq», – dep tahmin etti advokat.

​Qırım.Aqiqat qoşma malümat almaq içün Emil Kürbedinov ile bağlanmağa tırışa, faqat şimdige qadar advokat telefonını açmay.

YouTube kanalında Qırım Haberleri qullanıcısı Mamaq köyünde keçirilgen tintüvlerniñ bir qaç videosını yerleştirdi.

Advokat Edem Semedlâyev çarşenbe künü, oktâbr 12-de, bildirdi ki, oña Rusiye Federal havfsızlıq hızmetiniñ hadimleri qanunsız tintüv keçirgen evniñ saibinen körüşmege izin berilmedi.

«Saat 6:50 müşterim Emil Cemadinovğa keldim. Taqiqatçı advokatnı tintüvge almay. İnsanlar toplaştı. Taqiqatçınıñ bu areketlerinden şikâyet etecekmiz. Bu tintüv qanunsız tanılacaqtır», – dep bildirdi Semedlâyev.

Qırım işğalinden soñ yarımadada mustaqil jurnalistler, qırımtatar faalleri ve Meclis azalarında tintüvler sıqlaştı. Ukraina Tışqı işler nazirligi (TİN) Ukrain vatandaşları işğal olunğan Qırımda taqip etilgenlerinden raatsız olğanını beyan etip, basqılarnı toqtatmapa çağırdı. Bunıñnen beraber TİN Dünya toplulığına muracaat etip, bütün mumkün olğan siyasiy ve uquqiy imkânlar ile Rusiyege tesir etmege, onıñ totalitar usullarınen insan aqları ve söz serbestligini yoq etmesini toqtatmağa, ve apis etilgen ukrain siyasiy mabuslarnı azat etmege çağırdı.

XS
SM
MD
LG