Link açıqlığı

Qırımda Qırımtatar Milliy Meclisiniñ faaliyeti Rusiye tarafından yasaq etilse de, o, işini farqlı şekilde devam etecektir. Qırım insan aqları bağ gruppasınıñ koordinatorı Abdureşid Cepparov aynı böyle tüşüne. Uquq qorçalayıcı yañı vaziyette Meclis azaları ögünde peyda olğan vazifeler nasıl çezilecegini Qırım.Aqiqat içün añlattı.

– Abdureşit, al-azırda Meclis ne ifadeley?

– Meclis ve onıñ sistemasını umumen alsaq, al-azırda Meclisniñ bütün azaları aynı sırada degil. Rusiye tarafına keçkenler bar – devlet hızmetinde çalışqan, hızmet etkenler. Bazı insanlar vaqtınca indemey otura, adise-vaqialar nasıl olacağına baqalar. Esas Ukrainağa ketkenler bar, Qırımda qalıp, areket etmege devam etkenler de bar.

Abdureşid Cepparov

Abdureşid Cepparov

– Şimdiki vaqıtta angileriniñ vaziyeti eñ zor olacaq?

– Mence, Qırımda qalıp, areket etkenlerniñ vaziyeti eñ zor olacaq. Meclis Qırımdaki temsil organı olaraq Rusiye akimiyeti onıñ faaliyetini yasaq etmezden evel kibi olamaz. Amma olar başqa tarzda çalışacaqlar, Rusiye akimiyeti bunı qanunsız saysa da, olar yañı keyfiyette areket etmege devam etecekler.

– Bu yañı keyfiyet ne demek?

Olar gizli-gizli çalışmağa mecbur olacaqlar. Kerek olsa, teren yeraltına keçerler

– Bu yeraltı ve yeraltına yaqın bir şey olacaqtır. Olar sovetler zamanında qırımtatar milliy areketi yapqanı kibi gizli-gizli çalışmağa mecbur olacaqlar. Kerek olsa, teren yeraltına keçerler.

– Bu derece zor ve telükeli vaziyette bunı yapıp olurlarmı?

– Areket etken ve areket eteceklerden ğayrı, Qırımda Mecliske gizli çalışmağa yardım etecek daa çoq yañı faal ve yardımcılar olacaq.

– Bu vaziyette Meclis Qırımda eskisi kibi tesirli olurmı?

– Artıq Meclis qırımtatarlarğa, Qırımğa o qadar tesir etmez dep tüşünmek yañlıştır. Aksine, böyle vaziyetlerde iş daa keyfiyetli ola, çünki er bir söz ve areket içün cevap bermek kerektir. Bu sebepten bir taraftan qıyın, amma diger taraftan yañı şahıslar, yañı faaller peyda olacaq. Yañı tolu Meclisni şekillendirmege vaqıt kelgende, mence, bu da yaqında olur, anda eñ yahşı insanlar kelir.

Sentâbr 29-da Rusiye Yuqarı mahkemesi Rusiye kontrol etken Qırım Yuqarı mahkemesiniñ aprel ayında qabul etken Meclis faaliyetini «ekstremist» tanımaq ve onıñ faaliyetini yasaq etmek qararını tasdıqladı. Meclis advokatları Avropa insan aqları mahkemesine muracaat etecegini bildirdi.

Aprel ayında Meclis faaliyetini yasaq etme qararından soñ dünya toplulığı Rusiye akimiyetiniñ bu areketlerine qarşı narazılıq bildirgen edi. Meclis imayesi Rusiye Yuqarı mahkemesine şikâyette bulunğan edi.

XS
SM
MD
LG