Link açıqlığı

Ukraina prezidenti Petro Poroşenko sentâbr 21-de Birleşken Milletler Teşkilâtı Baş assambleyasınıñ 71-ci sessiyasında sözde bulunmağa niyetlene. Bu aqta malümatnı Birleşken Milletler Teşkilâtınıñ Haber merkezi bildire.

Birleşken Milletler Teşkilâtı (BMT) Baş assambleyasınıñ sessiyası resmiy olaraq sentâbr 13-te New-York şeerinde açıldı.

Er sene keçirilgen umumiy munaqaşalar sentâbr 20-de başlanacaq. Bundan evel BMT baş kâtibi Pan Gi Mun aza devletlerine er sene taqdim etilgen teşkilât işi aqqında maruzanı taqdim etecek. Bu kün Baş assambleyada birinci olaraq Braziliya ve AQŞ liderleri sözde bulunacaq.

Munaqaşalar sentâbr 26-ğa qadar devam etecek.

Sentâbr 19-ğa Qaçaq ve köçkenler meseleleri boyunca Sammitniñ keçirilmesi planlaştırılğan.

Birleşken Milletler Teşkilâtı Baş assambleyası BMT-niñ esas munaqaşa organı ola. Buña teşkilâtnıñ bütün aza devletleri temsilcileri kire, olarnıñ episi birer reyge malik. Barışıq ve havfsızlıq kibi müim meseleler boyunca qararlar üçte eki reylerniñ çoqluğını talap ete. Diger meseleler boyunca qararlar adiy çoqlulıq ile qabul etile.

XS
SM
MD
LG