Link açıqlığı

«Qırımtatar cemiyeti» ve Ukraina musulmanları assotsiatsiyası Kiyevde Qurban bayramını qayd etti


Qurban bayramı, Kiyev, sentâbr 13

«Qırımtatar cemiyeti» (Kiyev) ve «Ukraina musulmanları assotsiatsiyası» cemaat teşkilâtları Kiyevde Qurban bayramını (Eid al-Adha) qayd etti.

Bu aqta malümatnı Qırım.Aqiqatqa bayram iştirakçilerinden biri, qırımtatar milliy areketi veteranı Zevri Kurtbedinov bildirdi.

Onıñ sözlerine binaen, Ekspotsentr (Ukraina VDNH-sı) territoriyasında keçirilgen bayramğa üyle namazına tahminen 400 adam keldi.

«Tahminen 400, ya da ziyade adam bar edi. Musafirler içün tahminen300 kilogramm et pişirildi. Bilgenim kibi, tünevin mahsus eki buğanı soydılar, ayrı bir usulnen pişirilgen şorbanen tarqatıldı», – dep ayttı Kurtbedinov.

Kurtbedinovnıñ qayd etkenine köre, bayramğa kelgen musulmanlar arasında çoqusı Qırımdan köçkenler oldı.

Kurtbedinovnıñ sözlerine binaen, merasim Ukraina musulmanları assotsiatsiyası yolbaşçısı şeyh Suleymannıñ (Elimdar Hayrullayevniñ) ve «Qırımtatar cemiyeti» temsilcisi Ayder Rustemovnıñ çıqışlarından başlandı.

Cemaat namazından ve üyle aşından soñ teşkilâtçılar balalarğa ediyeler tarqattı.

Bundan evel Ukraina musulmanları assotsiatsiyası qurban çaldı ve muhtaclarğa berdi.

«Qırımtatar cemiyeti» Kiyevde yaşağan, Ukraina paythtına işğalden evel ve soñ kelgen qırımtatarlarnı birleştire. Ukraina musulmanları assotsiatsiyası 2014 senesi yazda, Rusiye Qırımnı işğal etken soñ, yarımadadan mecburiy köçkenler tarafından, musulman ukrainlernen beraberlikte teşkil etildi.

XS
SM
MD
LG