Link açıqlığı

Qırım mahkemeleri rusiyeli qanunlarnı ömürge keçirmey, bunı İlmi Umerovnıñ işi boyunca şikâyet arizasınıñ baqılması misalinde körmek mmkün, dep ayttı rusiyeli adliyeci Nikolay Polozov.

Onıñ sözlerine köre, imayeciler, bunen beraber, yuqarı müessiselerge şikâyet etip de, adaletni qazanmağa niyetlene.

«Eger Qırım ükümeti, Qırım mahkemeleri Umerovğa nisbeten qanunnı ömürge keçirmese, demek ki, Kremlge uracaqmız. O yerden olarnıñ başlarına ursınlar. Ümüt etem ki, bu nasıldır neticege ketirecektir», – dedi Polozov.

Sentâbr 13-te işğal etilgen Qırımda, mahkemeciler Fedorov ve Plastitinanıñ iştiraginen, apellâtsion müessiseniñ İlmi Umerovnıñ imayesi boyunca üç mahkeme toplaşuvı keçirildi. Adliyeciniñ sözlerine köre, bütün bular «aynı bir neticenen yekünlendi».

«Birinci dava, başlanğıç mahkemesiniñ cinaiy iş açılması aqqında qararnı qanunsız tanımasını red etkenine şikâyet arizamıznen bağlı edi. O yerde ciddiy tehnikiy hatalar olğanına baqmadan, mahkemeciler bunı normal olğanını saydı. Ekinci mahkeme faş etmeme aqqında imzalav meselesinen bağlı edi. Bu, aqiqaten, Umerovnıñ taqiqatçısı tarafından qanunsız qabul etildi», – dedi adliyeci.

«Maña olar mından Esas qanun mahkemesine tükürgenler kibi keldi. Bu yönelişte işimizni devam etecekmiz, çünki bu qanun boyunca olacaq», – dep qayd etti Polozov.

Adliyeciniñ aytqanına köre, üçünci mahkeme toplaşuvında İlmi Umerovnıñ psihiatrik hastahanede mecburiy ekspertizadan keçirilmesi belgilenmesi aqqında qarar baqıldı. Şikâyetni aynı baqılmayıp qaldırdılar.

«Elbet, bu yerde qanun ve uquq qaideleri iç çalışmay. Bunıñ içün, bizge tek diger seviyelerde, diger mahkemelerde, mahkemelerden tış, halqara seviyede küreşimizni devam etmek qala», – dep qayd etti Nikolay Polozov.

Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.

Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.

Sentâbr 7-de İlmi Umerov klinikadan çıqtı.

XS
SM
MD
LG