Link açıqlığı

Qırımda köylerde mesken şaraitiniñ eyileştirilmesi aqqında kene de hatırladılar


İşğal etilgen Qırımda köylerde yaşlar içün mesken şaraitiniñ eyileştirilmesine iddiası olğanlarnıñ cedvellerini tizmege başlaycaqlar.

Moskvağa boysunğan Qırım köy hocalığı nazirliginiñ matbuat hızmetiniñ bildirgenine köre, avgust 30-dan sentâbr 9-ğa qadar rayonlar ve şeer okrugları memuriyetlerinde köy yerlerinde mesken şaraitiniñ eyileştirilmesi boyunca merasimlerniñ iştirakçileri cedveliniñ tizilmesi içün arizalar qabul etilecek.

Beyanatta yaş qorantalar ve yaş mutehassıslarğa diqqat etile. Cedveller «2014-2017 seneleri ve 2020 senesine qadar müddetine köy topraqlarınıñ istiqrarlı inkişafı» federal programması çerçivesinde tizile, dep qayd ettiler müessisede.

Sene başında bildirilgen edi ki, Qırımda 2016 senesi «Köy topraqlarınıñ istiqrarlı inkişafı» programması «köy yerlerde yaşağan vatandaşlarnıñ, bu cümleden yaş qorantalar ve yaş mutehassıslarnıñ mesken şaraitiniñ eyileştirilmesine» 55,5 million ruble ayırılmasını belgiley.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG