Link açıqlığı

Avgust 26-da Aqmescit ava limanında Volgograd, Samara, Belgorod, Moskva ve Kursk şeerlerine bir sıra uçaq seferi lâğu etildi. Bu aqta malümat ava limanınıñ online tablosında bildirile.

Lâğu etilmesinden ğayrı, seferler keçiktirile, bazı yönelişlerde uçaq seferleri 12,5 saatqa keç qala. Hususan, şimdilik Yekaterinburg ve Moskvağa uçaqlar çıqıp olamay.

Bunen beraber, Aqmescitke Qazan, Mineralnıye vodı, Voronej, Moskva, Samara ve Belgorod şeerlerinden uçaq seferleri lâğu etilgen. Moskva, Sankt-Peterburg, Novosibirskten seferler keçiktirile.

İşğal etilgen Qırımda seferlerniñ keçiktirilmesi iyül 18-de başlandı, o vaqıt «VİM AVİA» şirketiniñ yolcuları Aqmescit ava limanında bir künden ziyade seferni bekledi. Bunı tehnikiy meselelernen añlatqan ediler.

O vaqıttan berli vaziyet aynı qalmaqta, Qırımğa uçaq seferleriniñ vaqtında yapılmasınen bağlı problemalar diger rusiyeli ava şirketlerinde de bar.

2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG