Link açıqlığı

Aqmescitte Qırımtatar Milliy Meclisi reisiniñ muavini Ahtem Çiygoznıñ işi boyunca şaatlarnıñ sorğuğa çekilmesi devam ete. Kremlge boysunğan Qırım Yuqarı mahkemesi onı 2014 senesi fevral 26-da ukraina tarafdarlarınıñ mitinginde iştirak etkeninde qabaatlay.

Qırımtatar Qurultayı Merkeziy saylav komissiyasınıñ reisi Zair Smedlâyevniñ sözlerine binaen, qabaatlav şaatları «meraqlı şeyler» ayta. Hususan, olardan aman-aman iç biri qabaatlav versiyasını tasdıqlap olamay.

«İşbu deliller bu mahkemede olmasa, diger bir mahkemede kerekli olurdır», – dep ayttı Smedlâyev Qırım.Aqiqatqa bergen izaatında.

«Tek bir militsioner Ahtem Çiygoznıñ qırımtatar tilinde emirler bergenini tasdıqladı. Digerleri, onıñ, Qırım Yuqarı Radasını zapt etmesi boyunca er angi cinaiy planlarını işlep çıqarğanını tasdıqlap olamay», – dedi o.

Smedlâyev, qabaatlav sırlı şaatlarnı qullanacağınıñ telükesi bar olğanını ayttı. Olarnıñ delilleri doğru olacağı şübe doğura.

«Bu adamlar skype vastasınen, resimsiz, deñiştirilgen sesnen şaatlıq etecek. Yani, aktör-ses yapıcıları evelden yazılğan cevaplarnı oquycaq, – dep emin olğanını bildirdi o, – biz bunı endi körgen edik».

Smedlâyev hatırlattı ki, qabaatlav şaatlarınıñ sayısı tahminen 80 kişiden ibaret, şimdilik tek 10 adam diñlenildi.

Ahtem Çiygoz 2014 senesi fevral 26-da Qırım Yuqarı Radası binası yanında Ukraina topraq bütünligine destek olaraq keçirilgen mitingde iştirak etkeni içün 2015 senesi yanvar ayında yaqalandı. İşğal etilgen Qırımnıñ rusiyeli ükümeti onı kütleviy nizamsızlıq yapqanında qabaatlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG