Link açıqlığı

Faaller Kiyevdeki Rusiye Federatsiyası elçiligi yanında zorbalıqnen ğayıp olğan işğal etilgen Qırım sakinleriniñ bulunğan yerlerini belgilemege talap etti. Bu aqta Qırım.Aqiqat mühbiri bildire.

Aktisya iştirakçisi, sabıq siyasiy mabus Gennadiy Afanasyev qayd etti ki, bütün ğayıp olğan Qırım sakinleri ukrain tarafını tutqan.

«Rusiye Federatsiyasından eñ qısqa müddet içinde bütün ğayıp olğanlar ve qaçırılğan kişilerni tapması ve taqiqat etmesi içün effektiv tedbirler alıp barmağa çağıramız. Ğayıp olğanlarnıñ qorantalarına olar aqqında iç olmasa nasıldır malümat bildirmege ve insan aqları çoq bozuvları içün tazminat bermege talap etemiz. Rusiyeden cinayetlerniñ ögüni körmek içün tedbirler keçirmesini ve ukrainlerniñ, qırımtatarlarnıñ ve bütün Ukraina vatandaşlarınıñ effektiv saqlanmasını teminlemesini talap etemiz», – dedi Afanasyev.

«Qırım SOS» vatandaşlar teşebbüsiniñ idarecisi Tamila Taşeva ilân etti ki, Rusiye Federatsiyası elçiligi yanında bu kibi aktsiyalardan ğayrı, faaller, yarımadada olğan vaziyetnen meraqlanğan halqara teşkilâtlar ve devletlernen muzakereler alıp bara.

Faaller, yarımadada bütün ğayıp olğanlar tapılmasına ve azat etilmesine qadar Rusiye elçiligi yanında bu kibi aktsiyalarnı keçirmege devam etmege söz berdi.

Rusiye Federatsiyası temsilcileri faallernen körüşmek içün çıqmadı.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Farqlı malümatlarğa binaen, işğal etilgen Qırımda 13-ten 20-ge qadar insan ğayıp oldı, eñ azdan 6 kişi öldürilgen tapıldı. Bundan sebep, Qırım SOS er aynıñ 25-inde Rusiye elçiligi yanında aktsiyalar keçirmek teşebbüsini bildirdi.

Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG