Link açıqlığı

Rusiye prezidenti Vladimir Putin ilhaq etilgen Qırımğa keldi. Mında o Telükesizlik şurasınıñ azalarınen toplaşuv keçirmege niyetli ve «Tavrida» gençlik forumını ziyaret etecektir.

Kremlin matbuat hızmeti Putinniñ işğal etilgen Qırımda keçirgen ziyareti aqqında malümat şimdilik yerleştirmey.

Bundan ögüne Vladimir Putin ilhaq etilgen Qırımnı mart 18 künü ziyaret etken edi. O vaqıt o helikopternen Keriç köpürüniñ qurulğan yerlerini nazardan keçirdi ve Qırımnıñ içtimaiy-iqtisadiy inkişafına bağışlanğan muşavere ötkerdi.

İyül 25 künü Qırımda ziyaret ile Rusiye baş naziri Dmitriy Medvedev bulunğan edi, o vaqıt o Qırımda yollarnıñ qurulması mevzusınen bağlı muşavere keçirdi. Bundan ögüne yapılğan Qırım ziyareti çerçevesinde mayıs 22 künü Medvedev Kefe şeerinde işğal etilgen Qırım muzeyleriniñ yolbaşçılarınen körüşken edi.

Soñki vaqıtları Moskva ve Kyiv arasındaki kerginlik beterleşti.

Avgust 10-da Rusiye Federal havfsızlıq hızmeti ilân etti ki, işğal etilgen Qırımda «yarımada infrastrukturası ve ayat teminlemesi içün pek müim obyektlerde» teraktlarnıñ ögüni kördi, Ukraina Mudafaa nazirligi Baş istihbarat idaresini bunı azırlağanında qabaatladı, «diversiya» teşkilâtçılarından biri yaqalanğanı aqqında bildirdi. Rusiye prezidenti Vladimir Putin, FSB beyanatını izaatlar eken, Kyivni muzakere yollarını qıdırmaq yerine teror usullarına keçkeninde qabaatladı.

Ukraina Arbiy quvvetlerniñ baş merkezinde FSB beyanatını inkâr ettiler ve onı provokatsiya kibi tanıdılar. Ukraina Devlet sıñır hızmeti Rusiyeniñ soñki künler devamında qıtaiy Ukraina ve işğal etilgen Qırım arasındaki memuriy sıñırğa yañı tehnika ile arbiylerni yaqınlaştığanı aqqında beyan etti, ve ukrainlilerni yarımadanı ziyaret etmemege çağırdı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG