Ukraina Tışqı işler nazirliginiñ yolbaşçısı Pavel Klimkin ilân ete ki, Kiyev ve Moskva arasındaki diplomatik munasebetler sıfırğa keldi, bunıñ içün Ukrainada Rusiye elçisi kerekli degil.
Bunen beraber, Klimkin qayd etti ki, Rusiyenen viza rejimini kirsetmek aşıqmaq kerekmey.
«Rusiye vatandaşlarına halqara ve devletlerara keçirüv noqtalarından tek tışqı pasportlarnen kirmege ruhset berdik. Tışqı işler nazirliginiñ noqta-i nazarından baqsaq, viza kirsetilmesine qarşı degilim, bunıñ içün neler kerek olğanını belgiledik, amma bu, simvolik tedbirlerden sebep olğan adım degil de, bunıñ neticesi ne olacağını añlap yapılğan adım olmalı», – dep ayttı Klimkin «5 kanal» yayınında.
Şimdiki vaqıtta Kiyevde rusiyeli elçi yoq, ukrain tarafı, Mihail Zurabov işten boşatılğan soñ, bu vazifege Mihail Babiçni qabul etmege red etti.
Avgust 11-de Ukraina prezidenti Petro Poroşenko, «Rusiyeniñ işğal etilgen Qırımda provokatsiya areketleri ve onıñ Donbassta faaliyetiniñ eskalatsiya munasebetinen» Ukraina Silâlı quvetler, Milliy Gvardiya, Ukraina Havfsızlıq hızmeti bölüklerini qaviyleştirilgen arbiy azırlıq alına ketirmege emir etti.
Rusiye Federal havfsızlıq hızmeti avgust 10-da bildirdi ki, işğal etilgen Qırımda «Ukraina Mudafaa nazirliginiñ Baş istihbarat idaresi tarafından azırlanılğan» bir sıra terroristik eylemlerniñ yapılmasına yol berilmedi, «onıñ esas obyektleri olaraq yarımadanıñ pek müim infrastruktura ve ayat teminleme elementleri belgilendi». Rusiye prezidenti Vladimir Pütin FSB beyanatını izaatlap, Kiyev muzakereler yolunı degil, terrorğa keçe, dep ayttı.
Ukraina Silâlı quvetleriniñ Baş ştabı Rusiye Federal havfsızlıq hızmetiniñ beyanatlarını red etip, bular provokatsiya olğanını aydınlattı. Ukraina devlet sıñır hızmeti bildirdi ki, Rusiye işğal etken Qırım ve esas Ukraina arasındaki memuriy sıñırğa yañı tehnikanen temin etilgen askerlerni qoydı, ukrainlerge yarımada ziyaretlerinden vazgeçmege tevsiye etile.
