Link açıqlığı

2015 senesi iyül ayında milletlerara munasebetlerni kerginleştirüv, ekstremizm ve separatizm teşviqatı alıp barğanında qabaatlanıp, FSB tarafından yaqalanğan Aqyar sakini Yuriy İlçenko qayd ete ki, Aqmescit taqiqat apishanesinde bulunğan vaqıtta rusiyeli uquq qoruyıcılar ve kamerada onen beraber bulunğanlar onı, ukrain vatandaşlığını red etsin ve özüni Aqyarda «Pravıy sektor» idarecisi olaraq tanısın dep, ura ediler. Bu aqta o, avgust 17-de Kiyevde keçirilgen matbuat konferentsiyasında bildirdi.

«Em hadimler, em de mennen kamerada beraber olğanlar urdı, büyreklerge, başıma, belkemikke urdılar, azca izler qaldırmaq ve çoqça azap ketirmek içün», – dedi İlçenko.

Onıñ qayd etkenine köre, Rusiye uquq qoruyıcı müessiseleri temsilcileri onen beraber kamerada bulunğan cinayetçilerge İlçenkoğa basım etkenleri içün apiste bulunma müddetlerini qısqartmağa söz bergen edi. O, onen beraber kamerada bulunğan kişilerden biriniñ sözlerine esaslandı.

İlçenkonıñ sözlerine köre, o, SİZO-dan azat etildi ve 2016 senesi iyün 2-ge qadar ev yaqalanmasına keçirildi. Bundan soñ o, yañıdan aynı qabaatlavlar boyunca yaqalanmamaq içün, Ukraina qıtaiy qısmına qaçmağa qarar aldı.

«İnternette biñlerce beyanatlarım bar edi... qaysı birlerini olar (rusiyeli ükümet – QA) Rusiyege qarşı olğanını sayğan edi», – dedi İlçenko.

İlçenkonıñ qayd etkenine köre, o, ayağından onıñ areketlerini kontrol etken bilezlikni kesip, qaçtı, ve tahminen bir yarım kün içinde Herson vilâyeti ile memuriy sıñırğa qadar mesafeni keçti. Bunen beraber, İlçenko bildire ki, «signalizatsiyanen teminlengen şeritten keçti», qaysı birinde, onıñ fikrince, mina qoyulğan edi.

Yuriy İlçenkonıñ aytqanına binaen, onıñ babası ve 1-ci gruppa saqatı olğan anası oña Ukraina qıtaiy qısmına köçti.

Aqyarda ecnebiy tiller şahsiy mektebiniñ saibi Yuriy İlçenko 2015 senesi iyül ayında Rusiye FSB hadimleri tarafından yaqalandı. O vaqıt o, internetteki saifesinde ukrain ükümetini Qırımnı bütünley blok etmege, bundan da ğayrı, Rusiye pasportını alğan Qırım sakinlerini ukrain vatandaşlığından marum etmege çağırdı. İlçenko yaqalanğan soñ, onıñ qaderi aqqında aman-aman malümat yoq edi.

XS
SM
MD
LG