Link açıqlığı

Qırımda mektep talebesi içün minimal komplektniñ fiyatı 20 biñge yaqın ruble teşkil ete – Kütleviy haber vastaları


Qırımda mektep talebesi içün minimal komplektniñ fiyatı 10 biñden 20 biñge qadar ruble teşkil eti. Keyfiyetli arqa çanta, sport ve deñiştirilecek ayaqqap, bundan da ğayrı, deñiştirilecek kölmek satın almaq kerek olsa, fiyat eki qat yüksele, dep bildire RİA Krım agentligi.

Neşir Qırım sakini Svetlananıñ sözlerini aytıp bere, o, Aqmescit bazarlarında adiy bir arqa çantanıñ fiyatı 2,6 biñ ruble olğanını bildirdi.

«Fistan, sarafan ve kölmekni 3,5 biñ rublege aldıq. Bu da deñiştirilecek forma almadan. Sport urbası – şort ve fotbolka tahminen 800-1000 ruble, kedler 350-500 ruble, sport ayaqqabı 1-1,5 biñ, adiy sport kostümi 2-2,5 biñ ruble. Bunen beraber, tufli, kolgotki, emekler içün urba, kantselâriya. Umumen olaraq, yavaş-yavaş satın almasañ, birden tahminen 20 biñ ruble kerek olacaq», – dep añlattı qadın.

Oğlan balanı mektepke azırlamaq içün aynı bu qadar para sarf etmek kerek. Picak fiyatları 1 biñ rubleden başlana, ştan – 350 rubleden başlap, kölmek – 350 rubleden 1,2 biñ rublege qadar. Kostüm olaraq alınsa, bu eñ azdan 1,5 biñ ruble olacaq, amma kölmek ve boyunbağ içün ayrı tölemek kerek olur.

Kremlge boysunğan Qırım ükümetiniñ Sanayı nazirliginiñ malümatına binaen, yarımadada 17 mahsus bazar ve eki yarmalıq çalışa. Bundan da ğayrı, mektep mahsulatı satılması içün yarımada bazarlarında 436 ticaret yeri ayırıldı.

2015 senesi mektep bazarında satıcılar qayd etken edi ki, keçken senege köre, mahsulat fiyatları 50 fayızğa, bazı şeylerniñ fiyatları ise 70 fayızğa arttı. Qırım sakinleriniñ sözlerine binaen, balanı bücet variantınen (sport kostümini almadan) mektepke azırlamaq içün tahminen 20 biñ ruble kerek edi.

XS
SM
MD
LG