Avgust 12-de evinde tintüv olıp keçken qırımlı Refat Mazalovnı Bağçasaray politsiyasınıñ bölügine alıp kettiler, sebebini kimse añlatmadı, dep bildire «Krımski politv'yazni» gruppası.
Berilgen malümatqa köre, erkekni alıp ketkende video çıqarıldı, lâkin OMON hadimleri çıqarılğan videonı silmege talap etti.
Şimdilik başqa bir malümat yoq.
Refat Mazalovnıñ evinde keçirilgen tintüv aqqında qırımlı Mümine Saliyeva bildirgen edi.
Rusiye kontrol etken Qırım uquq qoruyıcılarınıñ resmiy izaatları yoq.
Ukraina ve onıñ tışındaki uquq qorçalayıcı, devlet ve siyaset erbapları işğal etilgen Qırımda repressiyalar quvetlene bile, dep bildireler. Bunı em «Yarovayanıñ qanunları», em de Rusiye Federal havfsızlıq hızmetiniñ avgust 10-da Ukraina yarımadada «terakt» yapacaq edi kibi beyanatlarınen bağlaylar.
Rusiye Qırımnı işğal etken soñ yarımadada qırımtatarlarnıñ evlerinde sıq-sıq tintüvler keçirile, insanlarnı apiske atalar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
