Link açıqlığı

Bağçasarayda qırımtatarı Refat Mazalovnıñ evinde tintüv keçirilmekte. Bunı qırımlı Mümine Saliyeva Facebook saifesinde bildire.

«Bağçasaraydaki Fidanlar soqağında, 6-ncı mikrorayonda, Refat Mazalovnıñ evinde tintüv keçirile», – dep yazdı o, avgust 12-de.

Saliyeva başqa bir şey yazmadı.

Rusiye kontrol etken Qırım uquq qoruyıcılarınıñ resmiy izaatları yoq.

Ukraina ve onıñ tışındaki uquq qorçalayıcı, devlet ve siyaset erbapları işğal etilgen Qırımda repressiyalar quvetlene bile, dep bildireler. Bunı em «Yarovayanıñ qanunları», em de Rusiye Federal havfsızlıq hızmetiniñ avgust 10-da Ukraina yarımadada «terakt» yapacaq edi kibi beyanatlarınen bağlaylar.

Ekspertlerniñ zanınca, işğal etilgen Qırım ile memuriy sıñırdaki adiseler yarımadada yañı repressiyalarnıñ başlanğıçı ola bile.

Qırım ile memuriy sıñırdaki vaziyet avgust 7-de kerginleşti.

Avgust 10-da Rusiye Federal havfsızlıq hızmeti bildirdi ki, işğal etilgen yarımadada kerçekleştirilecek teraktlarnıñ ögü alındı. Moskva Ukrainanı qabaatlay. Rusiye prezidenti Vladimir Putin FSB beyanatını izaatlap, Kiyev muzakereler yolunı degil, terrorğa keçe, dep ayttı. O, «norman formatında» sammitni keçirmek «fayda yoq», dep qayd etti.

Ukraina prezidenti Petro Poroşenko Kremlniñ Qırım qabaatları «sebepsiz ve tsinik» olğanını ayttı.

Ukraina Silâlı quvetleriniñ Baş ştabı Rusiye Federal havfsızlıq hızmetiniñ beyanatlarını red etip, bular provokatsiya olğanını aydınlattı. Ukraina devlet sıñır hızmeti bildirdi ki, Rusiye işğal etken Qırım ve esas Ukraina arasındaki memuriy sıñırğa yañı tehnikanen temin etilgen askerlerni qoydı, ukrainlerge yarımada ziyaretlerinden vazgeçmege tevsiye etile.

Ukraina Tış işler nazirliginiñ bildirgenine köre, Ukraina Rusiyeniñ Kiyev Qırımdaki «terrorizm» ile bağlı olğanına dair malümatlarını takbih ete, Kreml kene de provokatsiya yapa ve bu lafları sebepsiz ola.

Ukrainada AQŞ elçisi Geoffrey Pyatt bildirdi ki, AQŞ Rusiyeniñ Ukrainağa qarşı «Qırım istilâsı» qabaatlarınıñ delillerini körmedi. Onıñ qayd etkenine köre, «Rusiye Ukrainağa qarşı yalan qabaatlar aytıp, özüniñ yañlış areketlerini gizleycek ola».

Ukraina havfsızlıq hızmeti işğal etilgen Qırım ile memuriy sıñırda ve Donbasstaki cenk areketleri alanında terrorist telüke seviyesini «qırmızı» dep işaretledi – Ukrainanıñ bu regionlarında vaziyet kerginleşti.

XS
SM
MD
LG