Link açıqlığı

Ukraina devlet sıñır hızmeti: cumağa keçer gecesi Rusiye mahsus hızmetleri «Kalançak» kiriş noqtasını qapattı, Qırım çıqışında – büyük nevbetler


Cuma künü, avgust 12-ne keçer gecesi, Rusiye mahsus hızmetleri tarafından işğal etilgen Qırım ile memuriy sıñırdaki «Kalançak» kontrol-kiriş noqtasınıñ qarşısındaki kiriş qapatıldı. Bunı Ukraina Devlet sıñır hızmetiniñ spikeri Öleg Slobodân Qırım.Aqiqatqa bildirdi.

«Qırım ile memuriy sıñırdaki kontrol-kiriş noqtaları yavaş çalışa. Tünevin kiriş bir qaç kere toqtatıldı ve aqşam üstü ara berildi: rusiyeliler «Kalançak» kontrol noqtasında işğal etilgen yarımağa kiriş-çıqışnı qapattılar. Teneffüs bir buçuq saat sürdi. Gece insanlarnıñ kirişi açıldı», – dep ayttı o.

Slobodân qayd etti ki, Ukraina devlet sıñır hızmeti vatandaşlarına Qırım ziyaretlerinden vazgeçmege tevsiye ete.

Rusiye tarafı memuriy sıñırnıñ qapatılmasını izaatlamadı.

Şaatlarnıñ Qırım.Aqiqatqa bergen malümatına köre, insanlar diger kiriş noqtalarına, şu cümleden Herson vilâyetindeki «Çaplınka» noqtasına keçmege mecbur edi. Al-azırda anda 500 insan nevbetini bekley. Qırımdan çıqmaq içün beş saat beklemek kerek, ukrain tarafında kiriş-çıqış bir saat içinde bite.

«Kalançak» ve «Çaplınka» kiriş noqtaları yanında yarımada tarafından yolnı KamAZlar qapata, nişancılar tura. Genç erkeklerni maşinalardan çıqıp urbanı çıqarmağa zorlaylar, aynı yerde de insanlar sorğuğa çekile. Sorğu eki ve ziyade saat devam ete. Uquq qoruyıcalar ziyaret maqsadını soray.

Yarımadadan çıqqan maşinalar da baqıla.

Qırım ile memuriy sıñırdaki vaziyet avgust 7-de kerginleşti.

Avgust 10-da Rusiye Federal havfsızlıq hızmeti bildirdi ki, işğal etilgen yarımadada kerçekleştirilecek teraktlarnıñ ögü alındı. Moskva Ukrainanı qabaatlay. Rusiye prezidenti Vladimir Pütin FSB beyanatını izaatlap, Kiyev muzakereler yolunı degil, terrorğa keçe, dep ayttı. O, «norman formatında» sammitni keçirmek «fayda yoq», dep qayd etti.

Ukraina prezidenti Petro Poroşenko Kremlniñ Qırım qabaatları «sebepsiz ve tsinik» olğanını ayttı.

Ukraina Silâlı quvetleriniñ Baş ştabı Rusiye Federal havfsızlıq hızmetiniñ beyanatlarını red etip, bular provokatsiya olğanını aydınlattı. Ukraina devlet sıñır hızmeti bildirdi ki, Rusiye işğal etken Qırım ve esas Ukraina arasındaki memuriy sıñırğa yañı tehnikanen temin etilgen askerlerni qoydı, ukrainlerge yarımada ziyaretlerinden vazgeçmege tevsiye etile.

Ukraina Tış işler nazirliginiñ bildirgenine köre, Ukraina Rusiyeniñ Kiyev Qırımdaki «terrorizm» ile bağlı olğanına dair malümatlarını takbih ete, Kreml kene de provokatsiya yapa ve bu lafları sebepsiz ola.

Ukrainada AQŞ elçisi Geoffrey Pyatt bildirdi ki, AQŞ Rusiyeniñ Ukrainağa qarşı «Qırım istilâsı» qabaatlarınıñ delillerini körmedi. Onıñ qayd etkenine köre, «Rusiye Ukrainağa qarşı yalan qabaatlar aytıp, özüniñ yañlış areketlerini gizleycek ola».

Ukraina prezident Petro Poroşenko Rusiye işğal etken Qırım ile memuriy sıñır rayonlarında ve Donbass yolunda ordunı cenk alına ketirmege emir etti.

XS
SM
MD
LG