Link açıqlığı

Qırımda yolcu avtobusı iştiraginen Sudaq-Kefe yolunda yüz bergen qaza boyunca cinaiy iş açıldı. Qaza neticesinde avtobus yolcuları elâk oldı, bazıları yaralandı.

Bu aqta Kremlge boysunğan Rusiye Taqiqat komitetiniñ Qırım idaresi matbuat hızmeti bildire.

Elde etilgen malümatqa köre, Rusiye Cinaiy kodeksi 238-ci maddesiniñ 3-ci qısmında belgilengen cinayet alâmetleri (muqaytsızlıqtan eki kişiden ziyade elâk olmasına ketirgen, havfsızlıq talaplarına uymağan hızmet etüv) boyunca cinaiy iş açıldı.

«Taqiqatnıñ malümatına köre, 2016 senesi avgust 11-de tahminen saat 17-ni 20 daqqa keçkende Sudaq-Keriç marşrutı boyunca ketken PAZ markalı avtobus aydavcısı Qızıl-Taş rayonında naqliyeni terenligi 50 metrge yaqın olğan yarğa tüşürdi, qaza neticesinde 4 yolcu elâk oldı, 11 yolcu ve aydavcı farqlı ağırlıq seviyelerinde yaralandı», – dep aytıla beyanatta.

Müessisede qayd ettiler ki, şimdiki vaqıtta «işbu cinayetniñ sebepleri ve şaraiti ögrenile, bunen beraber, avtobus yolcularınıñ ayatı ve sağlığı havfsızlığını teminlemegen şahıslar belgilene».

Avgust 11-de Sudaq-Kefe yolunda Sudaq-Keriç marşrutınen ketken yolcu avtobusı avdarıldı.

Rusiyeli «İnterfax» agentligi, acele hızmetlerdeki menbağa esaslanıp, bildire ki, «avtobusta 18 adam bar edi, olardan üçü baladır».

GİBDD Qırım idaresiniñ saytında qaza boyunca tafsilâtlı malümat yoq. Müessisede qayd etilgenine köre, qaza aqibetlerini yoq etmek içün 102 kişi ve 25 tehnika aleti, bu cümleden Fevqulade vaziyetler nazirliginden 24 adam ve 8 tehnika aleti celp etildi.

XS
SM
MD
LG