Link açıqlığı

Saatnıñ esas haberi

Abdureşit Cepparov: bir yerde Rusiye askerleri peyda olğan olsa, diqqatlı olacaqsın


Ateş ve patlavlar: Qırımdaki köyniñ sakinleri askerlerniñ yapqanlarından şikâyetçi (video)
Bekleñiz, lütfen

No media source currently available

0:00 0:02:17 0:00

Avgust 1-de Bağçasaray rayonında eki oğlan ormanda askerler peyda olğan soñ tanış olmağan şeylerni tapıp, yüz bergen patlavdan zarar kördiler. Bunı Qırım insan aqları bağ gruppasınıñ koordinatorı Abdureşit Cepparov Qırım.Aqiqatqa tafsilâtlıca añlata.

– Abdureşit, Bağçasaray rayonında olğan adise aqqında ne ayta bilesiñiz?

– Bağçasaray rayonında eki oğlançıq patlavdan zarar kördi. Qollarında belli olmağan bir şey patladı. Ne olğanını bilmediler, ve neticede bir bala hastahanede yata.

Avgust 2-de aqşam saatlerinde telefon ettiler, yüz bergen adise yerinde daa bir şey bar.

On «Uralnen» kelgen Rusiye askerleri Kokluz (Bogatoye Uşçelye) köyünde lager qurdı – bu Bağçasaray rayonınıñ Foti Sala (Golubinka) köy şurası ola

3-de Qırım insan aqları bağ gruppasınen beraber anda bardıq. Alğan malümatlarımızğa köre, tahminen on «Uralnen» kelgen Rusiye askerleri Kokluz (Bogatoye Uşçelye) köyünde lager qurdı – bu Bağçasaray rayonınıñ Foti Sala (Golubinka) köy şurası ola. Anda lager qurıp, elekrik stantsiyasını qoydılar. Sanki arbiylerniñ yanında balalar bar edi.

İyül 19 künü edi. Eki-üç kişi köy imamına kelip, azbarında suvalçannı qazmaq içün ruhset istedi. Qaydan kelesiñiz sualine deñiz piyade askerleri olğanını ayttılar. İmam böyle añlattı.

– Bu silâlı insanlar daa neler yapıp «belli oldılar»?

– Ebet, bu 19-da oldı, 20-de ise bu insanlar ya da olarnıñ bir qısmı köyde ateş açtılar. Avtomatik silâdan ateş açıldı. Olar arbiy urbada, yüzlerini qapatqan boya sürülgen. Talimler ya da oynaylar – añlaşılmay. Ne olğanını bilmeymiz. Talimler olsa, yerli akimiyetniñ haberi olacaq, çünki, nasıl olsa da, Rusiyede bir tertip-nizam bardır. Amma şeñlengen olsalar, pek şamatalı oyun oynaylar, etraftaki insanlar, köy sakinleri raatsızlana.

Yerli sakin Fikret Azizovnıñ azbarı yanında olğan bostanğa kirdiler. Ateş açqanda onıñ azbarına kirdiler. Oğlan kimler olğanını, ne içün ateş açqanlarını ögrenmek içün çıqtı. Sis bombasını atıp, qoradan atlap kettiler. Mına böyle meraqlı şeyler ola. İyül 24 kününe qadar anda ediler ve kettiler.

– Patlavdan zarar körgen oğlançıqlar aqqında ayta bilesiñizmi?

– Eki oğlan – köy sakinleri, birisi – Abdulla, 14 yaşında, ekincisi – qardaşı Abdurahman, qoylarnı baqqanda meraqlı bir şey kördiler. Onı aldılar. Babalarınıñ aytqanına köre, babası – imam, olar maden toplaylar, bu şeyni körip almağa istediler. Ne olğanını baqqanda bu şey Abdullanıñ qolunda patladı. Patlav – neticede balanıñ eli qırılğan, çinatiy parmağı yoq. Küçügi Abdurahmannıñ qarnında da yaralar bar. Ayaqlarından da parçalar çıqarıldı.

– Olardan ğayrı, başqa kimse yaralanmadımı?

– Bir qart bar – Seytmemet Seytcelilov, o, bu köyde dünyağa keldi, andan sürgün etildi ve anda da qayttı. Andaki bütün yollarnı ve etraftaki yerlerni bile. O, bir soqaqtan ketkende ayaqlarınıñ altında bir şeyge rastkeldi. Andan er kün keçe ve tanış olmağan şeyni köre. Onı ayağınen çetke atacaq oldı. Birden patlav yüz berdi. O, zarar körmedi, amma terekten yapraqlar töküldi, demek ki, parçaları bar edi.

Azbarında askerler ateş açqan Fikret Azizovnıñ balaları etraftaki yerlerni dolaşıp baqmağa başladılar, bir sıra arqan tapıldı

Azbarında askerler ateş açqan Fikret Azizovnıñ balaları etraftaki yerlerni dolaşıp baqmağa başladılar, bir sıra arqan tapıldı. Telefonğa video çıqardılar, içtimaiy ağlarda paylaştılar.

– Siz buña ne dersiñiz?

– Meraqlı bir şey, askerler oyun oynay, insanlar ise ormanğa çıqmağa, piçen çalmağa, soqaqlarda qorqalar. Adamlar ormanğa muhtac, anda meyva, mantar toplay, qoylarnı, ayvanlarnı tutalar. Birisi bir yip ya da başqa belli olmağan bir şeyge rastkelip patlamaycağını kim bile. Er şey oldı, amma böyle bir şeyni daa körmedik.

Buña talim demek pek zor, çünki yanlarında balaları bar edi. Şimdi olarnı em politsiya, em FSB qıdıra, amma kimler olğanını bilmeyler. Anda 10 «Ural» olğan olsa, daa ne kerek? Olarnı tapmaq zor degil. Bir şey añlaşılmay.

Mına böyle adiseler oldı, Allah bersin de, aqibetleri olmasın, çünki tartılğan arqanlar ne olacaq belli degil. Bir yerde askerler peyda olsa, diqqatlı olacaqsın. Anda ne kibi iz qaldıracaqlar – bilmeymiz.

İleride taqiqat organlarınıñ buña dair malümatını ögrenecekmiz.

XS
SM
MD
LG