Link açıqlığı

Radio Svobodanıñ leyhası olğan Qırım.Aqiqat saytı Rusiye tarafından işğal etilgen Qırımda Kremlge boysunğan yarımada prokuraturasınıñ vesiqalarına binaen blok etilgen. Bu aqta «RİA Novosti» agentligine rusiyeli Qırım prokurorı Natalya Poklonskaya bildirdi.

«Qırım.Aqiqatnen bağlı yapılğan bütün areketler – Qırım cumhuriyeti prokuraturasınıñ, hususan, 8 adamdan ibaret olğan ekstremizm ve terrorizmge qarşılıq kösterüv bölüginiñ hadimleriniñ teşebbüsinen yapılğan areketlerdir. Bu bizim böyle qattı bölügümizdir, balalar pek yahşı çalışa ve ekstremizm ve terrorizmge qarşılıq kösterüv boyunca bütün operativ hızmetlerniñ faaliyetini idare ete», – dep ayttı Poklonskaya.

Bunen beraber, o, «Çernomorka», «ATR», «Sobıtiya Krıma» ve «Meridian Sevastopol» saytlarına kiriş blok etilgeniniñ sebeplerini añlatmadı.

Rusiye tarafından işğal etilgen Qırımda internet provayderleri mustaqil neşirlerni blok etmege devam ete. Avgust 4-te, cumaaqşamı künü, Qırım.Aqiqattan soñ, «Meridian Sevastopol» mustaqil internet neşriniñ saytı blok etildi. Bu aqta internet qullanıcıları bildire.

Sayt memuriyeti ya da provayder hostingi adına iç resmiy muracaat etilmedi. Muarririyet, resurs blok etilgeni sebebini ögrenmek içün malümat sualinen muracaat etken internet provayderleri daa cevap bermedi.

Avgust 1-de Radio Svobodanıñ leyhası olğan Qırım.Aqiqat saytı Rusiye tarafından işğal etilgen Qırımda qısmen blok etildi. Bir sıra provayderler saytqa kirişni blok etti. Avgust 2-de yarımadada «Çernomorka», «ATR», «Sobıtiya Krıma» saytları blok etilip başladı. Bu saytlar yarımada regionlarınıñ çoqusında qısmen blok etile. Şimdiki vaqıtta Qırım.Aqiqat saytını Yaltada ve qomşu Rusiyede açmaq mümkün.

Qırımnıñ rusiyeli malümat naziri Dmitriy Polonskiy Qırım.Aqiqatqa bildirdi ki, saytqa kiriş blok etilmesi aqqında onıñ haberi yoq.

Qırım.Aqiqat Roskomnadzorğa malümat sualinen muracaat etti, amma şimdilik cevap yoq.

OSCE-de, Qırım.Aqiqat saytınıñ blok etilmesi boyunca izaat berip, qullanıcılarnıñ İnternette malümat alma ve paylaşma aqqı haber saytlarına kirişni blok etüv vastasınen bozuluvından qasevet çekkenlerini bildirdiler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG