Link açıqlığı

Saatnıñ esas haberi

Keriç köpründe gemi keçüv qısmını qurıp başladılar


Keriç boğazında köpür qurucıları onıñ gemi keçüv qısmını qurıp başladı. Bu aqta «Krımskiy most» haber agentligi bildire.

Bildirilgen malümatqa köre, Keriç-Yenikale kanalı üstünde gemi kemerli keçüvini suvdan 35 metr yükseklikke köterecekler. Bu, köpür astında Qara deñizden Azaq deñizine ketken ve qaytqan gemilerniñ keçüvine yol berecek.

«Tuzla adasından soñ köpür farvater qısmına yaqınlaşıp yükselmege başlay, bu yerde eñ yüksek noqtasına kele – suv seviyesinden 35 metr. Daa 45 metr yükseklikke – gemi kemerli keçüviniñ eñ yüksek noqtası. Yani, köpürniñ gemi keçüv qısmınıñ umumiy yüksekligi 80 metrni teşkil ete. Moskva Kremliniñ Troitskaya qullesi aynı yüksekliktedir», – dep ayttı «Taman» yol idaresiniñ baş müendisi Yuriy Safonov.

Köpürniñ eñ yüksek noqtası olğan gemi keçüvi eki büyük tayamada turacaq. Olarnı 12 ay içinde qurmağa planlaştıralar. Qayd etilgenine köre, tayama diametri 1420 mm olğan 110 çelik boru qazığında turacaq. Şimdiki vaqıtta qazıq temeli teşkil etile.

Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi. Köpürni 2018 senesine qadar qurmağa, 2019 senesi yazda işke tüşürmege vade etken ediler.

İyül başında «Krımskiy most» haber agentligi Rusiyeden Qırımğa Keriç boğazında köpür qurulmasınıñ umumiy fiyatı 227,92 milliard ruble teşkil etecegini bildirgen edi.

Bundan evel bildirilgen edi ki, Rusiye ükümeti Keriç boğazında köpürniñ demiryol qısmınıñ vaqtınca işke tüşürilmesiniñ başlanuvını bir yılğa, yani 2018 dekabr ayından 2019 senesi dekabr ayına keçirdi.

Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG