Avgust 1-den Qırım naqliye naziri vazifesine Anatoliy Volkov buyuracaq, dep bildire Kremlge boysunğan Qırım ükümetiniñ «ruporı» olğan «Krıminform» saytı, Qırım Nazirler şurasındaki menbağa esaslanıp.
Bildirilgenine köre, iyül 30-da Kremlge boysunğan Qırım ükümetiniñ yolbaşçısı Sergey Aksönov videoselektor toplaşuvında ilân etti ki, Volkovnı nazirlik kollektivine bazarertesi künü taqdim etecekler.
«Naqliye naziri Volkov Anatoliy Anatolyeviç şahsiy terkipke bazarertesi künü taqdim etilecek. Anatoliy Anatolyeviç, esnasqa qoşulıñız, bazarertesi künü sizni resmiy şekilde taqdim etemiz», – dep bildirdi menba Aksönovnıñ sözlerini.
Neşirniñ qayd etkenine köre, 2013 senesine qadar Anatoliy Volkov «Kuban» federal yollar idaresiniñ yolbaşçısı vazifesini eda etken edi, şimdiki vaqıtta o «Kaspiy» Federal yol agentliginiñ Federal avtomobil yolları idaresi» Federal devlet müessisesiniñ müdiri ola.
İyül 19-da Aksönov Kremlge boysunğan Qırım naqliye naziri Andrey Bezsalovnı istifağa yolladı.
Bundan evel iyül ayında Aksönov Rusiyege boysunğan Qırım ükümetiniñ Meskün-kommunal hocalığı naziri Aleksandr Jdanovnı, bundan soñ onıñ birinci muavini Aleksey Boçarovnı istifağa çıqardı.
